جنیواٹی ٹرانسپورٹ آ پاکستان مخالف پوسٹر خلنگ نا واقعہ غا دفتر خارجہ سوئس سفیر ءِ بٹنگسا برانز کرینے
اسلام آباد۔ 20 ستمبر (اے پی پی) بنجائی وزیر لیفٹیننٹ جنرل (ر) عبدالقادر بلوچ پارینے کہ جنیوا ٹی ٹرانسپورٹ آ پاکستان مخالف پوسٹر خلنگ نا واقعہ غا پاکستان نا آخبتی نمائندہ تون پاننگانے کہ پاکستان نا کنڈآن اوڑآ برانز کننگے، دفترخارجہ سوئس سفیر ءِ بٹنگسا برانز کرینے۔ چارشنبے نادے قومی اسمبلی ٹی نعیمہ کشور خان جنیوا ٹی پاکستان مخالف پوسٹر آتا بابت توجوہ مبذول نوٹس نا ورندی ءِ ترسا بنجائی وزیر جنرل (ر) عبدالقادر بلوچ پارینے کہ جنیوا ٹی بی ایل اے تون اوار ایلو پاکستان مخالف عنصر آک داوڑنا کارروائی کننگ ءُ، ہروار دُن انگا خلقت پوسٹر آتے ہرفسا بش مریرہ ولے داوار تو بس آتیا ہم پوسٹر خلنگانے۔ جنیوا ٹی پاکستان نا آخبتی نمائندہ تون پاننگانے کہ پاکستان نا کنڈآن داواقعہ غا برانز کننگے۔ دفترخارجہ ٹی سوئس سفیر ءِ ہم بٹنگسا برانز کننگانے۔ توجوہ مبذول نوٹس آ نعیمہ کشور خان، انجینئر محمد عثمان بادینی، سردارکمال خان بنگلزئی و خالد حسین مگسی نا سوج آتا ورندی ٹی جنرل (ر) عبدالقادر بلوچ پارے کہ ہراوخت آ ملک اسے نا تہہ ٹی دُن ءُ ویل اس مون آ برے تو نن تینا مفاد آتا رکھ اکن سفارتی وڑوڈول ءِ اختیار کرسا سفیر ءِ خواہفسا برانز کننگک۔ اقوام متحدہ نا سیکورٹی کونسل نا اسہ قرارداد اسے نا رداٹ ہراکہ تنظیم ہرادے دہشت گرد گوندنگانے اونا سرجزآتے توننگ مریک۔ اوپارے کہ داہیت راست ءِ کہ دا سازش نا رند اٹ ننا دشمن ملک آک فنڈنگ کرینو بھارت داٹی سرفہرست ءِ ۔ اوفاضل باسک نا دا سلاہ غان اتفاق کرے کہ ایوان اٹی داحالیت آتا برخلاف قرارداد اس بایدے برے۔ اسہ سوج اسے نا ورندی ٹی اگہ گڑاس جتائی پسند عنصر داکارروائی تے کننگ ءُ تو داڑآن دامطلب ءِ ہلنگپ کہ بلوچستان نا غٹ خلقت اونا پشت پناہی ءِ کننگ ءُ۔ ننے اوفتا ہیت ءِ غلط ثابت کننگ کن زیات اہمیت بایدے تروئی مف۔ داکالعدم تنظیم ءِ۔ بی ایل اے نا کنڈآن بلوچستان اٹی کارروائی تیٹی بھلو حد اسسکان کمتی واقع مسنے، ننا دشمن اوفتے کاریم اٹ اتنگ ءِ ، حکومت و وزارت خارجہ مچ آ حالیت آتیا نظر تخانو، زیات گڑتی نا ہچ ءُ ہیت اس اف۔ بلوچستان نا ہندی ویل آتا بابت اسہ سوج اسے نا ورندی ٹی جنرل (ر) عبدالقادر بلوچ پارے کہ بلوچستان اٹی ساڑی وسیلہ و ویل آتا نیام اٹ بھاز بھلو پرخ اس ئس ہژدہ می ترمیم آن پد اوٹی گچینی بسنے۔ بلوچستان اٹی حالیت آک گدرینگوک آ سال آتا نسبت گچین مسنو۔
