وزیراعظم شاہد خاقان عباسی نا ترکی نا صدر رجب طیب اردوان تون اوڑدہی ، ہڑتوم آ کنڈآتا تعلقداری تے سوگو جوڑ کننگ آ سرجم خیال آتا درشان، پاکستان و ترکی نا تعلقداریک اسیجائی عقیدہ ، اقدار ، دودوربیدہ ، تاریخ ، تین پہ تینی پت و کمکاری آمبنی ئُ، وزیراعظم شاہد خاقان عباسی ، اوغان جھیڑہ نا ہچ ئُ فوجی ایسری اس اف، اوغانستان اٹی پائیدار امن و سوگوی نا مون آ دننگ کن پاکستان، اوغانستان ، ترکی سہ کڑدہ ہی عمل بحال، روہنگیا مسلمان تا مشکل آتا چٹفنگ کن دمدستی گام گیج کننگ آ ہڑتوم آ راہشون تا امنا

نیویارک۔ 19 ستمبر (اے پی پی) وزیراعظم شاہد خاقان عباسی ترکی نا صدر رجب طیب اردوان تون سے شنبے نادے داڑے اوڑدہی کرے۔ دا اوڑدہی اقوام متحدہ نا جنرل اسمبلی نا دیوان نا وخت آ مس، ہڑتوم آ راہشونک ہڑتوم آ کنڈآتا تعلقداری تے سوگو جوڑ کننگ نا بابت سرجم خیال آتا درشانی ئِ کریر۔ اوڑدہی ٹی علاقائی امن و سلامتی نا حالیت آتیا ہم خیال آتا درشانی ئِ کننگا۔ وزیراعظم شاہد خاقان عباسی پارے کہ پاکستان و ترکی نا تعلقداریک اسیجائی عقیدہ ، اقدار، دودوربیدہ ، تاریخ، تین پہ تینی پت و کمکاری آٹی ئُ۔ اوپارے کہ ہڑتوم آ ملک آتا الس نا نیام اٹ رابطہ غاک اسٹریٹجک شریداری ٹی بدل مسنو و ہر ہنوک آ دے اتون دا پین سوگو مننگ ئُ۔ ہڑتوم آ ملک آتا نیام اٹ باقاعدہ بڑزکو کہولی ہن و بر و بڑزکو کہول اسٹریٹجک کمکاری کونسل نا کمک اٹ ادارہ جاتی رابطہ غاتا ستائِ کرسا ہڑتوم آ راہشونک سیاسی، دفاعی ، واپاری و زرکاری ہن و بر نا مون آ دننگ آ است جمی نا درشانی ئِ کریر۔ ہڑتوم آ راہشونک داہیت آ زورشاغار کہ ہڑتوم آ ملک آک اقتصادی کمکاری ئِ ودفنگ آ خصوصی چکار کننگ نا چرجوئی ئِ برجاتخر و ہڑتوم آ کنڈآتا واپار نا مون آ دننگ کن آزاد واپار نا معاہدہ ئِ زوت گڈیکو دروشم اس تننگ کن اواری اٹ کاریم کیر۔ وزیراعظم شاہد خاقان عباسی پارے کہ پاکستان و ترکی اہم قومی مفاد آتا معاملہ غاتیا اسہ ایلو تون کمک کرینو۔ وزیراعظم بھارت نا کوزہ ٹی جموں و کشمیر نا الس نا جہد کن ترکی نا غیر متزلزل مخ تفی آ ترک صدر نا منت واری ئِ ادا کرے۔ ترک صدر رجب طیب اردوان اہم جہانی و علاقائی معاملہ غاتیا ہڑتوم آ ملک آتا اسہ وڑنا خیالات و چندی بشخ آتیٹی ٹھوس کمکاری نا کمک اٹ ہڑتوم آ کنڈآتا تعلقداری تے سوگو جوڑ کننگ نا ستائِ کرے۔ اوہڑتوم آ ملک آتا تین پہ تینی مفاد اٹی اسٹریٹجک شریداری ئِ سوگو جوڑ کننگ کن ترکی نا عزم انا اعادہ ئِ کرے۔ ہڑتوم آ راہشونک علاقائی حالیت آتیا ہم خیال آتا درشانی ئِ کریر۔ اوغانستان اٹی امن و سوگوی کن کوشست آتا بابت او داہیت آ امنا کریر کہ اوغان جھیڑہ نا ہچ ئُ فوجی ایسری اس اف و اوغانستان اٹی اوغان تا کمک اٹ و اوفتا سروکی ٹی امن عمل نا کمک اٹ اوغانستان اٹی اندرونی سیاسی مصالحت کن علاقائی اپروچ اختیار کرسا کوشست آتے برجا تخنگے۔ ہڑتوم آ راہشونک اوغانستان اٹی پائیدار امن و سوگوی نا مون آ دننگ کن پاکستان ، اوغانستان ، ترکی سہ کڑدہ ہی عمل نا بحالی آ ہم امنا کریر۔ ترک صدر رجب طیب اردوان و وزیراعظم شاہد خاقان عباسی روہنگیا مسلمان تا معاملہ غاہم خیال آتا درشانی ئِ کریر و جہانی برادری و او آئی سی آ زور شاغار کہ روہنگیا مسلمان تا مشکل آتا چٹفنگ کن دمدستی گام گیج کننگے۔