سی پیک و بیلٹ اینڈ روڈ ڈٹ آتون گنڈوک ملک آک و ڈیہہ تینا سرسہبی تے یکجا کرسا شونداری نا رفتار ئِ ترند کننگ نا زبردست وارخواہی تیان فائدہ ہرفنگ کیرہ
ڈن ہوانگ(چین) ۔ 19 ستمبر (اے پی پی) سی پیک و بیلٹ اینڈ روڈ ڈٹ آتون گنڈوک ملک آک و ڈیہہ تینا سرسہبی تے یکجا کرسا شونداری نا رفتار ئِ ترند کننگ نا زبر دست وارخواہی تیان فائدہ ہرفنگ کیرہ۔ داخیال آتا درشانی ئِ پاکستان نا قومی خبررساں ادارہ (اے پی پی) نا منیجنگ ڈائریکٹر مسعود ملک و ایلو ساڑی مروک آک چین نا صوبہ گانسو نا شار ڈن ہوانگ اٹی سے شنبے نادے بیلٹ اینڈ روڈ ڈٹ آ اڈ ہلوک آ میڈیا کارپوریشن فورم آن تران اٹی کریر۔ فورم اٹی 126ملک و جہانی ادارہ غاتا 265صحافتی ادارہ غاتا نمائندہ غاک شرکت کریر۔ فورم نا بست و بند ئِ چین نا صوبہ گانسو نا حکومت و پنی چینی اخبار پیپلز ڈیلی اواری وڑاٹ کرینو۔ ایم ڈی اے پی پی مسعود ملک تینا تران اٹی پارے کہ سی پیک بیلٹ اینڈ روڈ ڈٹ انا ہمو پلو ئِ ہراڑآ عملدرآمد دا بھلا ڈٹ ئِ سرسہبی نا داستان اس جوڑ کیک۔ سی پیک پاکستان نا اقتصادی شونداری ٹی بنداوی کڑد ادا کیک۔ داڈٹ انا رداٹ پاکستان اٹی توانائی نا چندی ڈٹ آتے پورو کننگ انگ ئِ ۔ اوپارے کہ بیلٹ اینڈ روڈ ڈٹ چین انا ہمو بھلا گام ئِ ہرا نئے بیرہ دا ڈیہہ بلکن دنیا نا ایلو براعظم آتے ہم ترند تر و پائیدار اقتصادی و راجی شونداری نا بنجاتیٹی بدل کیک۔ دانئے بیرہ نیزگاری کون آ ویل آتا مون ئِ توننگ اٹی کمک ایتک بلکن مچ آ دنیا ئِ مون تروک بے روزگاری نا چٹفنگ اٹی ہم کمک ایتک۔ دا جہانی معیشت نا رفتار ئِ پوسکن آ بڑزی تسکان دننگ نا جوزہ ئِ ودی کیک۔ داڈٹ انا رداٹ گام گیج آک شونداری نا رفتار ئِ بے حد ترند کیک۔ داڈٹ وسیلہ غاتا کمتی نا باوجود شون ہلوک آ ملک آتیٹی ترندی اٹ شونداری نا پوسکن آ جوزہ ئِ ودی کرینے۔ داڈٹ آ عملدرآمد اٹی مچ آ دنیا اقتصادی شونداری و راجی آجوئی نا بشخ آتیٹی بے مثل سرسہبی دوئی کیک۔ دا ڈٹ زند انا چندی بشخ آتیان تعلق تخوک آ بندغ آتے ترند رفتار شونداری نا بریبر وارخواہی فراوان کیک۔ بیلٹ اینڈ روڈ ڈٹ گنڈوک ملک آک تینا شونداری ہدف آتا ترندی اٹ دوئی کننگ نا بارواٹی پراومیت مسنو ۔ اوپارے کہ گانسو صوبہ چین و دیکی دنیا نا نیام اٹ کمکاری ئِ ودفنگ اٹی اہم کڑد ادا کرے۔ داڑتون اوار اوار صوبہ چینی صدر نا بیلٹ اینڈ روڈ انیشی ایٹو آ عملدرآمداٹی ہم اہم کڑد ادا کرے۔
