نیویارک۔ 19 ستمبر (اے پی پی) وزیر خارجہ خواجہ محمد آصف و عرب لیگ نا سیکرٹری جنرل احمد عبدلغیت فلسطین و جموں و کشمیر نا حالیت خاص کر کوزہ گر فوج انا کنڈآن کودک شاری، زالبول ، بزرگ و چناتے ظالمانہ و لس بیداد نا نشانہ جوڑ کننگ آ گڑتی نا درشانی ئِ کرینے۔ وزیر خارجہ خواجہ آصف و عرب لیگ نا سیکرٹری جنرل نا نیام اٹ اقوام متحدہ نا جنرل اسمبلی نا وخت آ اوڑدہی مس۔ داوخت آ ہیت وگپ کرسااوپاکستان نا علاقائی امن ، ہم آہنگی و کمکاری نا مون آ دننگ کن کڑد ئِ امنا کرسا اونا ستائِ کرے۔ اوپاکستان نا عرب ملک آتون برادرانہ تعلقداری بشمول فلسطین نا ویل آ اونا کنڈآن غیر متزلزل مخ تفی نا حوالہ ئِ ترسا پارے کہ پاکستان مسلم دنیا ئِ مون تروک ویل آتا ایسری ٹی مثبت کڑد ادا کننگ کیک۔ داوخت آ وزیر خارجہ خواجہ محمد آصف عرب لیگ نا سیکرٹری جنرل ئِ تنظیم نا فعال سروکی کننگ آ مبارکبادی تس وپارے کہ مسلم دنیا نا نیام اٹ سوگوی کن عرب لیگ نا کڑد بنداوی ئُ اہمیت اس تخک۔ داوخت آ عرب لیگ نا سیکرٹری جنرل وزیر خارجہ ئِ قاہرہ نا دورہ نا سلہ تس ۔ خواجہ محمد آصف کرغزستان ، بٹسوانہ و نمیبیا نا وزیر خارجہ غاتون اوڑدہی کرے و اختہ ہی ئُ دے گدریفے۔ کرغزستان نا وزیر خارجہ ارلان عبدلدائف تون اوڑدہی ٹی کاسا 1000 ڈٹ اکن المی بست و بند آتا پوروی و ہڑتوم آ ملک آتا نیام اٹ اڈ تروک رابطہ غاتا حالیت آتیا است جمی نا درشانی ئِ کننگا۔ کڑدہ غاک چندی کثیر الجہتی فورم خاص کر اقوام متحدہ ، شنگھائی کمکار تنظیم و اقتصادی کمکاری تنظیم اٹی تین پہ تینی کمکاری ئِ ودفنگ آ امنا کریر۔ ہڑتوم آ وزیر خارجہ غاک پاکستان و کرغزستان نا نیام اٹ 25سالہ ہڑتوم آ کنڈآتا تعلقداری نا بابت ہڑتوم آ کنڈآتا ڈل آتا ہن و بر و بڑزکو کہول آ صلابت نا انعقاد آ امنا کریر۔ نمیبیا نا وزیر خارجہ خواجہ محمد آصف ئِ تینا حکومت نا اقتصادی اولیت آتا بارواٹی معلومدار کرے و تینا ملک انا سفارتکار آتا کاریم نا کچ ئِ ودفنگ اٹی پاکستان نا کنڈآن کمکاری نا فراوانی نا ستائِ کرے۔ ہڑتوم آ وزیر خارجہ غاک اقتصادی و واپاری بشخ آتیٹی ہڑتوم آ کنڈآتا کمکاری ئِ پین ودفنگ نا گرج آ زور شاغار۔ داوخت آ نمیبیا ئِ ایکسپو پاکستان 2017ءو آئیڈیاز 2018ءٹی بشخ ہلنگ نا سلہ خلنگا۔ داکان بیدس بٹسوانہ نا وزیر خارجہ پیلو نومی وینسن پاکستان تون اقتصادی ، واپاری ، تعلیمی و دفاعی بشخ اٹی تعلقداری تے ودفنگ نا خواہش نا درشانی ئِ کرے۔ ہڑتوم آ وزیر خارجہ غاک زرکاری و اقتصادی کمکاری نا گمان آتے پٹنگ آ امنا کریر۔ وزیر خارجہ خواجہ محمد آصف بٹسوانہ نا کاروباری برادری ئِ ہم ایکسپو 2017ءو آئیڈیاز 2018ءنا ساڑی مننگ نا سلہ خلک۔
