ہڑتوم آ ملک آتا نیام اٹ رابطہ غاتے سوگو جوڑ کننگ آ خیال آتا درشانی ئِ کننگا، دفترخارجہ
نیویارک۔ 19 ستمبر (اے پی پی) سیکرٹری خارجہ تہمینہ جنجوعہ اوغانستان نا نائب وزیر خارجہ حکمت کرزئی تون اوڑدہی کرے، ہڑتوم آ ملک آتا نیام اٹ رابطہ غاتے سوگو جوڑ کننگ آ خیال آتا درشانی ئِ کننگا، ہڑتوم آ راہشون تا نیام اٹ اوڑدہی اقوام متحدہ نا جنرل اسمبلی نا 72 می دیوان نا وخت آ داڑے نیویارک اٹی مس۔ دفترخارجہ نا رداٹ اوڑدہی ٹی پاکستان و اوغانستان اٹی امن و سوگوی نا اسیجائی مسخت آتے دوئی کننگ کن ہڑتوم آ ملک آتا نیام اٹ کمکاری ئِ سوگو جوڑ کننگ نا گرج آ زور شاغنگا۔ سیکرٹری خارجہ پارے کہ پاکستان علاقائی سوگوی کن اوغانستان اٹی پائیدار امن نا خواہندار ئِ۔ اوداہیت آ ہم زورشاغاکہ اوغانستان نا حالیت آتا ہچ ئُ فوجی ایسری اس اف۔ سیکرٹری خارجہ تہمینہ جنجوعہ پارے کہ اوغان الس و سروک آ تالان امن عمل آ چکار کروئی مریک۔ سیکرٹری خارجہ مستی پارے کہ پاکستان و اوغانستان ئِ چندی بشخ آتیٹی کمکاری ئِ سوگو جوڑ کننگ کن اواری اٹ کاریم کروئی مریک۔ اوغانستان نا ڈپٹی وزیر خارجہ پارے کہ اوغان حکومت پاکستان تون تعلقداری تے سوگو جوڑ کننگ نا عزم تخک و او غٹ کہول آتیا ہڑتوم آ ملک آتا نیام اٹ کمکاری ئِ پین ودفنگ نا گرج آ زورشاغا۔
