راولپنڈی ٹی آئی ٹی یونیورسٹی نا اڈتننگ آن راجی و اقتصادی شونداری نا عمل ترند مریک
اسلام آباد۔ 19 ستمبر (اے پی پی) صدر مملکت ممنون حسین پارینے کہ راولپنڈی ٹی آئی ٹی یونیورسٹی نا اڈتننگ آن راجی و اقتصادی شونداری نا عمل ترند مریک و تعلیم نا بشخ اٹی پین درملکی زرکاری نا خوش دلی اٹ خیرمقدم ئِ کننگک۔ داہیت ئِ او درملکی زرکارآتا ڈل اتون ہیت وگپ کرسا پارے ہرا سے شنبے نادے سینیٹر کامران مائیکل نا سروکی ٹی اوڑتون ایوان صدر اٹی اوڑدہی کریر۔ ڈل اٹی درملکی ملٹی نیشنل کمپنی تا سروک آک اوار ئسر۔ صدر ممنون حسین پارے کہ تعلیم انسانی لائخی تیٹی ودکی نا غٹ آن بھلا ذریعہ ئِ و ساڑی حکومت راجی و اقتصادی بشخ اٹی شونداری کن بھاز خواری کننگ ئِ۔ اوڈل ئِ پارے کہ حکومت ملک اٹی بڑزکو تعلیم ئِ مون آ دننگ کن چندی ڈٹ آتیا کاریم کننگ ئِ ہرافتے ٹی وزیراعظم لیپ ٹاپ اسکیم و وزیراعظم فیس واپسی پروگرام کون آ ڈٹ آک اوار ئُ۔ صدر مملکت پارے کہ ملک انا معاشی و اقتصادی شونداری ٹی یونیورسٹی تا اہم ئُ کڑد اسے ۔ صدر مملکت پارے کہ ملک اٹی دہشت گردی نا بھاز بھلو حد اسسکان مون ئِ توننگانے۔ زرکاری کن گچین ئُ چاگڑد اس ساڑی ئِ و پاکستان ٹیکسٹائل سیکٹر اٹی زرکاری نا مون ملوک آ است اٹ خیرمقدم ئِ کیک۔ صدر ممنون حسین ڈل انا کنڈآن روات اٹی پنجاپ حکومت نا اواری اٹ انفارمیشن ٹیکنالوجی یونیورسٹی نا اڈتننگ آ خوشی نا درشانی ئِ کرے و تعلیمی ڈٹ آتا اڈتننگ نا چرجوئی ٹی درملکی ڈل انا خذمت آتا ستائِ کرے۔ اومستی پارے کہ راج انا نیزگار تپہ غاتا گچینی کن اوفتا جہد مستحسن ئِ ۔ صدر مملکت پاکستانی طالب علم آتے اسکالر شپس تننگ نا خیرمقدم ئِ کرسا پارے کہ حکومت تعلیم اٹی رفاحی سرجزآتا مون آ دننگ کن کمک کرسا کیک۔ اوپارے کہ پاکستان ونٹر اولمپکس اٹی ضرور بشخ ہلیک۔
