پاکستان جنرل الیکٹرک کمپنی نا مہارت آن بھاز فائدہ دوئی کننگ ئِ ، درملکی کمپنی تا پاکستان اٹی زرکاری کن درگہ غاک ملوک ئُ ، وزیراعظم شاہد خاقان عباسی
نیویارک۔ 19 ستمبر (اے پی پی) وزیراعظم شاہد خاقان عباسی تون جنرل الیکٹرک نا نائب صدر جان رائس داڑے نیویارک اٹی اوڑدہی کرے۔ جان رائس پارے کہ پاکستان جنرل الیکٹرک کن اسہ اہم ئُ مارکیٹ اسے ۔ نائب صدر پارے کہ نن پاکستان اٹی تینا کاروبار ئِ ودفنگ کن پرعزم اُن۔ جان رائس پارے کہ پاکستان اٹی لوکوموٹو و جان جوڑی نا بشخ اٹی زرکاری نا خواہندار اُن۔ وزیراعظم شاہد خاقان عباسی جنرل الیکٹرک نا پاکستان تون وابستگی نا ستائِ کرسا پارے کہ پاکستان جنرل الیکٹرک کمپنی نا مہارت آن بھاز فائدہ دوئی کننگ ئِ۔ وزیراعظم پارے کہ درملکی کمپنی تا پاکستان اٹی زرکاری کن درگہ غاک ملوک ئُ۔ وزیراعظم شاہد خاقان عباسی پارے کہ پین امریکی کمپنی تے پاکستان اٹی چندی بشخ آتیٹی زرکاری کن بخیرٹ پانہ۔
