امریکہ و پاکستان نا نیام اٹ سوگو توانائی نا معاہدہ غاتے فعال جوڑ کننگک
امریکہ سوگو توانائی نا معاہدہ ءِ عملی جامہ اس بیرفنگ کن پاکستان نا پبی کمک ءِ کیک، ڈیوڈ ہیل
اسلام آباد۔ 18 ستمبر (اے پی پی) ڈپٹی چیئرمین ڈٹ بندی کمیشن سرتاج عزیز تون پاکستان اٹی تعینات امریکی سفیر ڈیوڈ ہیل و توانائی نا بشخ آن تعلق تخوک آ چاہندار آک دوشنبے نا دے داڑے اوڑدہی کریر۔ اوڑدہی ٹی پاکستان و امریکہ نا نیام اٹ پاکستان کن سوگو توانائی کن امریکہ و پاکستان نا نیام اٹ کمکاری آ خیال آتا درشانی ءِ کننگا۔ داوخت آ ڈپٹی چیئرمین ڈٹ بندی کمیشن سرتاج عزیز پارے کہ امریکہ و پاکستان نا نیام اٹ سوگو توانائی نا معاہدہ غان توانائی نا بشخ اٹی پاکستان نا لائخی و کاریم نا کچ اٹی ودکی مریک۔ اوپارے کہ حکومت ملک اٹی توانائی نا بشخ اٹی خودکفالت و مون تروک چیلنج آتیان عہدہ براہ مننگ کن درملکی زرکاری و اوناوڑوڈول اٹی آسانی اتنگ کن گچین گام گیج کننگ ءِ۔ پاکستان توانائی نا بشخ اٹی پوسکن ءُ ٹیکنالوجی اس درستی راستی کرفنگ و دابشخ ءِ پوسکن آدور اتون ہم آہنگ جوڑ کننگ کن گام گیج کننگ ءِ۔ سرتاج عزیز پارے کہ امریکہ و پاکستان نا نیام اٹ سوگو توانائی نا معاہدہ غاتے فعال جوڑ کننگک، پاکستان و امریکہ نا نیام اٹ سوگو توانائی نا معاہدہ غاتا زئم آک زوت بایدے مون آ بریر۔ سوگو توانائی نا معاہدہ و اونا نتیجہ ٹی پٹ وپول نا مندرجات و لائحہ عمل ءِ دوانزدہ می پنچ سالہ ڈٹ انا بشخ جوڑ کننگک۔ داوخت آ امریکی سفیر نا کنڈآن پاکستان اٹی توانائی نا بشخ اٹی کروک آ گام گیج آتا ستاءِ کننگا۔ اوپارے کہ امریکہ سوگو توانائی نا معاہدہ ءِ عملی جامہ اس بیرفنگ کن پاکستان نا پبی کمک ءِ کیک۔
