او کشمیر نا ویل ، میانمار نا روہنگیا مسلمان تا تنکی و اوغانستان نا حالیت آتیا چکار تخک
اقوام متحدہ ٹی پاکستان نا سفیر ملیحہ لودھی نا پاکستانی صحافی تے بریفنگ
اقوام متحدہ ۔ 18 ستمبر (اے پی پی) وزیراعظم شاہد خاقان عباسی نیویارک نا چار دے ئی دورہ ٹی اقوام متحدہ نا جنرل اسمبلی آن تران آن بیدس کیہی جہانی راہشون آتون اوڑدہی کیک، ہراٹی او کشمیر نا ویل ، میانمار نا روہنگیا مسلمان تا تنکی و اوغانستان نا حالیت آتیا چکار تخک۔ تدوک آ تُو وزارت عظمیٰ نا سوغند ہرفنگ آن پد اقوام متحدہ نا دااونا اولیکو دورہ ءِ۔ اقوام متحدہ ٹی پاکستان نا سفیر ملیحہ لودھی پاکستانی صحافی تے بریفنگ ترسا پارے کہ وزیراعظم شاہد خاقان عباسی نا امریکی نائب صدر مائیک پینس تون اوار 9 ہڑتوم آ کنڈآتا اوڑدہی پک مسنے و پین اومیت ہم ارے۔ ایلوفتے ٹی اردن نا شاہ آن بیدس ترکی، اوغانستان ، سری لنکا ، ایران، برطانیہ و نیپال نا راہشون آتون اوڑدہی اوار ءِ۔ او اقوام متحدہ نا سیکرٹری جنرل انٹونیو گوٹرش تون ہم ملک۔ داکان بیدس وزیراعظم مسکوہی امریکی وزیر خارجہ ہنری کسنجر و گڑاس امریکی راہشون آتون ہم خیال آتا درشانی ءِ کیک۔ وزیراعظم شاہد خاقان عباسی 21 ستمبر آ اقوام متحدہ نا جنرل اسمبلی آن تران کیک او جہانی سیاست و اہم سیاسی ، راجی و شونداری معاملہ غاتیا پاکستان نا موقف ءِ پیش کیک۔ ملیحہ لودھی پارے کہ امریکہ پاکستانی راہشون آتون تینا نائب صدر مائیک پینس نا اوڑدہی تجویز کرینے۔ انتئے کہ او پاکستان تون اول سرآن رابطہ غاتا خواہندار ءِ۔ باخبر ذرائع نا رداٹ دااوڑدہی اینو سے شنبے نا دے آمریک ہرا اوغانستان و سویلی ایشیاء نا بارواٹی صدر ٹرمپ نا پالیسی نا رداٹ مریک۔ دابریفنگ اٹی ساڑی امریکہ ٹی پاکستان نا سفیر اعزاز چوہدری اسہ سوج اسے نا ورندی ٹی پارے کہ امریکہ نا اوغانستان نا بارواٹی تینا نکتہ نظر ءِ و پاکستان نا تینا موقف ءِ۔ سفیر ملیحہ لودھی وضاحت کرسا پارے کہ ملک انا قومی مفاد آ مبنی پاکستان نا پالیسیک واشنگٹن اٹی آخا، اسلام آباد اٹی مرتب کننگک۔ اوپارے کہ پاکستان نا دا پدریسہ موقف مسنے کہ مذاکراتی تصفیہ نا کمک اٹ امن قائم کننگ مریک۔ جنرل اسمبلی نا دیوان نا وخت آ وزیراعظم شاہد خاقان عباسی خارجہ تعلقداری تا بارواٹی کونسل و امریکی پاکستان بزنس کونسل آن ہم تران کیک۔ او جہانی ذرائع ابلاغ تون ہم اوڑدہی کیک۔ جنرل اسمبلی نا دیوان اٹی او آئی سی، نام، جی 77 ، ای سی او، سارک، دولت مشترکہ ، ڈی 8 تون اوار علاقائی و ذیلی علاقائی تنظیم آتا وزارتی دیوان ہم اڈ ہلیک داوخت آ او آئی سی رابطہ رڑ کشمیر نا دیوان ہم مریک۔
