دراھیں سیاسی گل وتی کستءُ کینگاں یک نیمگ ءَ ایر بہ کن اَنت ءُ صوبہ ءِ دیمروئی ءُ وشھالی ءِ ھاترءَ یکجائی ءَ کار بہ کن اَنت
سی پیک ءِ تہ ءَ ھندی مردم آناں برابر ھک دیگ بہ بیت
اسلام آباد۔17ستمبر(اے پی پی ) بلوچستان نیشنل پارٹی (بی این پی مینگل ) ءِ باسک سینیٹر ڈاکٹر جہانزیب جمالدینی ءَ بلوچستان ءِ چاگردی ءُ اقتصادی دیمروئی ءِ ھاترءَ کسانیں انڈسٹریل زونز، کسانیں ڈیم جوڈ کنگءُ مزنیں وانگءُ زانی ادارگ جوڈ کنگءِ ضلورتءِ سرءَ زور پِرداتگ ءُ گشتگ کہ دراھیں سیاسی گل وتی کستءُ کینگاں یک نیمگءَ ایر بہ کن اَنت ءُ صوبہ ءِ دیمروئی ءُ وشھالی ءِ ھاترءَ یکجائی ءَ کار بہ کن اَنت۔ اُمیت اِنت کہ پاک چین اقتصادی راہداری (سی پیک) ءِ جوانیں اَثرات بلوچستان ءِ اُلسءَ سربنت ءُ آھانی زندءِ جاورھال جوان بنت۔ آئی ءَ اے ھیالانی درشانی اے پی پی ءِ گوما ھاسیں گپ ءُ تران ءِ تہا کتگ اَنت۔ سینیٹر جہانزیب جمالدینی ءَ سی پیک ءِ ھاسیت ءِ ھوالگ ءَ گوشتگ کہ ایش ھما وھد ءَ پدّر بنت کہ وھدے کہ ایشی ءِ پائیدگ تچک ءَ تچک بلوچستانءِ اُلسءَ را سربنت ءُ پُج اَنت۔ آھانی زند ءَ وشھال کن اَنت، آئیءَ سی پیک ءِ ردءَ منصوبگ آنی تہا بلوچستانءِ اُلسءِ سرءَ ھاس دلگوشی کنگءِ ارزشتءَ را درشان کتگ کہ آھودہ بلوچستانءِ مردماناں تعلیم، جانءُ سلامتی ءُ روزگارءِ موھ دست بہ کپ اَنت۔ آئیءَ گشتگ کہ گوستگیں حکومتءِ دلگوش نہ کنگءِ سببءَ صوبہ ءِ اُلس انوگیں سائنسی دورءَ ھم بازیں بنکی ھکاں چہ زھبار اَنت ءُ بلوچستان جیڑھءُ جنجالانی امبارے جوڑ بوتگ ءُ آھودے اُلس بے روزگاری، جانءُ سلامتی ءِ آسراتی نہ بوھگءِ جیڑھ ءُ ایندگہ زھباری ءِ آماچ اَنت ءُ آ صوبائیءُ بنجاھی حکومت ءَ گوں اے اُمیت ءَ کنگءَ اَنت کہ آھانی جاورھالانی شرکنگءَ یک جوانیں گہبودی ریلیف پیکیج ءِ جارءَ جنت کہ ایشی ءِ ردءَ مزنیں مزنیں دیمروئیءِ منصوبہ بندات کنتءُ بلوچستانءِ اُلسءَ را وشیں ھالے دنت۔آئیءَ اُمیت ءِ درشانی کتگ کہ انوگیں حکومت بلوچستانءِ اُلس ءَ را آھانی بنکی ھکاناں پھجارین ایت ءُ آھاں دگہ پڑءِ ھمکچ کنت۔ سینیٹر ڈاکٹر جہانزیب جمالدینی ءَ گشتگ کہ صوبہ بلوچستان قدرتی مالءُ مڈی ءَ چہ است مند اِنت بلے ایشاں چہ راستیں پاھدگ چست کنگ بوھگءَ نہ اِنت۔ ضلورت ایش اِنت کہ صوبہءِ تہا کسانیں صنعتی زونز جوڈ کنگ بہ بنت کہ ایشانی تہا ھندی ءُ دری زرکاراناں زرکاری کنگءِ دعوت دیئگ بہ بیت تانکہ بے روزگاری ھلاس بہ بیت ءُ صوبہءِ مالءُ مڈی ءَ چہ پاھدگ چست کنگ بہ بیت۔ آئیءَ سوج داتگ کہ صوبہ ءِ تہا سمال ڈیم پراجیکٹ ءِ بندات کنگ بہ بیت تانکہ سرجمیں صوبہءِ تہا کہ آپ نہ بوھگءِ سوبءَ کشتءُ کشاری نہ بیت، آپ ءِ جیڈھ گیش ءُُ گیوار کنگ بہ بیت تانکہ ادا کشتءُ کشاری کنگ بہ بیت ۔ آئی ءَ گشتگ کہ مئے پارٹی بی این پی (مینگل) نہ حکومتءِ ھلاپ اِنت ءُ نہ دگہ پارٹی ءُ نہ سی پیک ءِ ھلاپ اِنت۔ ما ایوک ءَ اے چیز ءَ لوٹ آں کہ ھندی مردم اے منصوبہءِ تہا برابر ءِ بھر مند بہ بنت ءُ ڈلگ چار کنگ مہ بنت۔ ایشاں چہ ابید گوادر ءِ تہا جدید یونیورسٹی ءُ کالج جوڑ کنگ بہ بنت تانکہ آھودے ھندی مردم تعلیم ءِ پڑءَ دیم بہ بنت۔ سینیٹر جہانزیب جمالدینی ءَ گشتگ کہ مئے نزیکءَ توامیں پارٹی عزتءُ شرپ ءِ لائک اَنت۔ ما مزن گسءِ مزنی ءِ سرءَ اوست کن آں۔ یک جُستے ءِ پسوءَ آئیءَ گشتگ کہ بلوچستان ءَ مُچیں گل وتی کستءُ کینگاں یک نیمگے ءَ ایر بہ کن اَنت ءُ صوبہ ءِ وشھالی ءِ ھاترءَ یک جاھ ھوار ی ءَ کار بہ کن اَنت۔ آئی ءَ اے گپ ءِ سرءَ زور پِر داتگ کہ مئے راج جہدءُ کوشتءُ محنت بہ کنت، وانگءُ زانگءِ سرءَ دلگوشی بہ دنت تانکہ بلوچ راج ایندگہ راج آنی وڑ ءَ دیمروئی بہ کنت۔
