اسلام آباد ۔ 14 ستمبر (اے پی پی) مزن وزیر شاہد خاقان عباسی ئَ بلوچستان ئِ ضلع ڈیرہ بگٹی ئَ کچھی کینال پراجیکٹ ئِ بنگیج کت۔ 80ارب کلدار ئِ کساس ئَ سسرجم بوھوکیں کچھی کینال ئَ چہ ڈیرہ بگٹی ئِ دور ئُُ گستائیں دمگ آنی 72ہزار اایکٹر جوانیں بلے لائک ئِ کشت ئُُ کشاری زمین سیراپ بیت۔ چیئرمین واپڈا لیفٹیننٹ جنرل (ر) مزمل حسین ئَ مزن وزیر ئَ را کچھی کینال منصوبگ ئِ بابت ئَ بریفنگ دات۔ توکی کارانی وزیر احسن اقبال، بُنجاھی وزیر سیفران عبدالقادر بلوچ، وزیر برائے آپی مڈی سید جاوید شاہ، وزیر مملکت برائے پٹرولیم جام کمال، وزیر مملکت برائے آبی وسائل دوستین خان ڈومکی، وزیراعلیٰ بلوچستان سردار ثناءاﷲ خان زہری، سینیٹر سردار یعقوب ناصر، قومی اسمبلی ئِ باسک خالد حسین مگسی، بلوچستان ئِ صوبائی وزیر ئُُ کلانئیں کارندہ اے موہ ئِ سر ئَ ساڑی اتنت۔ کچھی کینال (فیز1) ئِ سرجمی ئَ واٹر انفراسٹرکچر ئُُ کشت ئُُ کشاری ئِ آپ شانی ئِ شوبگ ئَ مزیں بُن ھشت اِت۔ کچھی کینال منصوبگ ئِ سر ئَ کار 15سال پیسر بندات بوتگ ئُُ ایشی ئِ ھواریں کچ ئُُ کساس دراجیں مھتلی ئِ سبب ئَ اے منصوبگ کم ئُُ گیش تُستگ ئُ سرد بوتگ۔ بُنجاھی حکومت ئِ جوانیں سپورٹ ئُُ واپڈا ئِ جزم ئِ بدولت ئَ اے منصوبگ ئَ را پد ئَ زندگ کنگ بوتگئُُ گڈ ئَ 80ارب کلدار ئِ کساس ئَ اے منصوبگ ئِ سر ئَ کار سرجم بوتگ۔ تونسہ بیراج ئَ چہ در کپوکیں 363کلو میٹر دراج بُریں نیامی کور ڈیرہ بگٹی ئِ ھُشکیں زمین ئَ سییر آپ کنت۔ اے کور ئِ شت ئَ آپ ئِ گنجائش 6000کیوسک اِنت وھدیکہ منصوبگ ئِ چیر دستی ئَ 914کوکا جوڑ کنگ بوتگ۔ کچھی کینال بلوچستان ئِ کوچگی دمگ ئَ کشت ئُُ کشاری ئِ پڑ ئَ معیشت ئِ دیمروئی ئِ ھاترا اقتصادی دیمروئی ئُُ چاگردی گہتری ئَ را دل یکیمی کنگ ئِ یک مزنیں المی ایں منصوبگ اِت ۔ کچھی کینال پراجیکٹ ئِ سرجمی ئَ چہ بلوچستان انڈس ریور سسٹم ئَ چہ وتی بھر ئِ آپ ئَ زُرت کنت ایشی ئِ سبب ئَ ھندی آباتی وتی زمین آں کشت ئُُ کشاری کنگ ئُُ ایشی ئِ اقتصادی برورد آں چہ نپ چست کنگ ئِ لائک بوت کن اَنت۔
