اسلام آباد۔ 25 اگست (اے پی پی) پاکستان سمجھوتہ ایکسپریس اٹی اوار کرنل پروہت تون اوار بھارتی انتہاپسند آتا رہائی آ گڑتی نا درشانی ئِ کرسا پارے کہ کرنل پروہت ئِ بھارتی فوج انا مخ تفی دوئی ئس، بھارتی انتہاپسندبھارتی ادارہ غاتیٹی سرایت کرینے، امریکی دوبہ غاتیا عجلت اٹ ورندی تننگ نا گرج الوکہ، پاکستان غٹ دہشت گرد رڑ تا برخلاف بے پرخ غٹ کارروائی تے کننگ ئِ۔ پنچ شنبے نادے دفترخارجہ نا ترجمان محمد نفیس ذکریا ہفتہ وار پریس بریفنگ اٹی صحافی تا چندی سوج آتا ورندی ئِ ترساپارے کہ امریکی پالیسی آ ورندی کن کابینہ دیوان اٹی شرہ مس ۔ قومی سلامتی کمیٹی نا دیوان طے شدہ ئس ، کمیٹی ورندی تس و دوبہ غاتے مسترد کرے، ننے عجلت اٹی ورندی تننگ نا گرج الوکہ۔ ترجمان پارے کہ نن بلاتعصب غٹ دہشت گرد آتا برخلاف کارروائی کرینن، امریکی سینیٹرز ، کانگرس باسک، امریکی و برطانوی ملٹری کمانڈر آتے سویلی وزیرستان نا دورہ ئِ ہم کرفنگا ہراڑآ اوفک ہموڑے کارروائی آ است جمی نا درشانی ئِ کریر و پاک فوج انا سرسہبی و قربانی تا ستائِ کریر۔ اوغانستان نا بابت اسہ سوج اسے نا ورندی ئِ ترسا اوپارے کہ اوغانستان نا بابت ننا موقف صفائِ ، نن اوغانستان اٹی امن کن تینا کڑد ئِ ادا کرسا کینہ انتئے کہ اوغانستان اٹی امن و سوگوی پاکستان نا تینا مفاد اٹی ئِ۔ اوپارے کہ پاکستان اوغانستان اٹی امن کن مخلصانہ کوشست کننگ اٹی ئِ۔ ترجمان پارے کہ وزیراعظم شاہدخاقان عباسی اولیکو دورہ ئِ سعودی نا کرے وخت اس کہ وزیر خارجہ خواجہ آصف ہم زوت امریکہ تون اوار ڈیہہ نا چندی ملک آتا دورہ ئِ کیک ولے امریکہ نا دورہ نا شیڈول داسکان طے متنے۔ داکان بیدس سیکرٹری خارجہ تہمینہ جنجوعہ چین اٹی چینی وزیر خارجہ و تینا ہم منصب تون اوڑدہی کرے۔ امریکی صدر نا پالیسی بیان اٹی ڈیہہ ٹی بھارتی کڑد انا بابت اسہ سوج اسے نا ورندی ئِ ترسا ترجمان پارے کہ ڈیہہ ٹی پوسکن ئُ پارٹنر شپ اس جوڑ مننگ ئِ و پوسکن ئُ پیش رفت و بدلی مننگ ئِ وخت اس کہ بھارت ڈیہہ ٹی ریاستی دہشت گردی ٹی اوار ئِ و ڈیہہ ٹی امن نا ضامن مننگ کپک۔ نن مستین اٹی ہم پارین کہ بھارت ئِ ڈیہہ ٹی سلامتی نا ضامن نا کڑد ئِ تننگ مفک، بھارت نا چندی ملک آتون جھیڑہ غاک ئُ وخت اس کہ بھارتی تخریبی سرجزآتیا اقوام متحدہ نا سیکرٹری جنرل ئِ ڈوزیر ز ہم جمع کرفینن۔ اوپارے کہ نن اوغانستان نا عزم انا جوانی اٹ بلداُن کہ او اوغانستان اٹی انت کننگ ئِ نئی دہلی اوغان گل زمین ئِ پاکستان اٹی نزوری کن کاریم اٹ اتنگ ئِ۔ ترجمان سمجھوتہ ایکسپریس اٹی اوار کرنل پروہت تون اوار ہندوانتہاپسند عنصر آتا رہائی نا بابت اسہ سوج اسے ناورندی ئِ ترسا پارے کہ بھارتی انتہاپسند بھارتی ادارہ غاتیٹی سرایت کرینے، آر ایس ایس و ایلو تنظیمک بھارتی عدلیہ و ایلو ادارہ غاتا فیصلہ غاتیا اثرانداز مننگ ئِ، سمجھوتہ ایکسپریس اٹی اوار بھارتی انتہاپسند آتا رہائی ننا موقف نا تائیدئِ وخت اس کہ کرنل پروہت ئِ بھارتی فوج انا مخ تفی دوئی ئس، بھارتی فوج آر ایس ایس ئِ ہم سپورٹ فراوان کیک۔ نفیس ذکریا پارے کہ کشمیری حریت راہشون تا غیر کانودی دزگیری و جان جوڑی نا آسراتی تا مفننگ آ بھاز گڑتی ئِ، ننے شبیراحمد شاہ نا تہاڑ جیل آ گدریفنگ و اونا جان ئِ لاحق خلیس و علی گیلانی ، یاسین ملک ، شبیر احمد شاہ و آسیہ اندرابی ئِ زیر حراست تخنگ آ گڑتی ئِ ۔ ترجمان بھارت نا کنڈآن کشمیر نا جغرافیائی ہیئت ئِ بدل کننگ آہم گڑتی نا درشانی ئِ کرینے۔
