اوغانستان ننا برادر ہمسایہ ملک ئِ، بلیم گیم آن بیدس اسیجائی دشمن نا برخلاف پت انا بنداو آ مربوط کمکاری المی ئِ
راولپنڈی۔ 25اگست (اے پی پی) بری فوج انا سروک جنرل قمر جاوید باجوہ پارینے کہ اوغانستان ننا برادر ہمسایہ ملک ئِ، بلیم گیم آن بیدس اسیجائی دشمن دہشت گرد آتا برخلاف پت انا بنداو آ مربوط کمکاری المی ئِ، نسخان دہ واک آتا کنڈآن تخلیق کروک منفی ذہنیت ئِ مر کننگ کن میڈیا کلیدی کڑد ادا کننگ کیک۔ او جمعہ نا دے اوغان میڈیا نا ڈل اتون ہیت وگپ کریکہ۔ پاک فوج انا شعبہ تعلقات عامہ (آئی ایس پی آر) نا رداٹ 9باسکی اوغان صحافی تا ڈل جی ایچ کیو نا دورہ ئِ کریر و آرمی چیف اتون درستی و راستی نشست اس تخار۔ بری فوج انا سروک جنرل قمر جاوید باجوہ پارے کہ پاکستان غٹ رنگ و نسل نا دہشت گرد آتا برخلاف بے پرخ کارروائی کرینے، داسہ پاکستان نا تہٹی دہشت گرد آتا ہچ ئُ ہم رکھوک پناہ گاہ اس ساڑی اف و داعزم انا اعادہ ئِ کرے کہ پاکستان نا گل زمین ئِ اوغانستان نا برخلاف کاریم اٹ اتنگ مفک۔ اوپارے کہ پاک اوغان سیم آ موثر سیمی بست وبند کن پاکستان نا کنڈآ باڑ خلنگ و پوسکن ئُ سیمی پوسٹ جوڑ کننگ انگ ئِ۔ اوغان صحافی تا ڈل آرمی چیف جنرل قمر جاوید باجوہ نا قیمتی وخت تننگ و است انا ھب اٹ ہیت وگپ آ منت واری ئِ ادا کریر۔ اوغان ڈل اعتراف کرے کہ اسہ ایلو ئِ پہہ مننگ کن داوڑنا دورہ غاک بھاز فائدہ مند جوڑ مریرہ، و حق آتیا مبنی مثبت ذہنیت تون پدی تینا وطن آ کانہ۔ اوغان صحافی تا دا ڈل آئی ایس پی آر نا کمک اٹ پاکستان نا شش دے ئی دورہ غاٹی ئُ۔
