ملکی آبادی 1998ءآن 2017ءٹی 2.4 درسد نا سالانہ شرح نمو تون 20 کروڑ 77لکھ 74ہزار مس
اسلام آباد۔ 25 اگست (اے پی پی) پاکستان نا شش میکو قومی خانہ و مردم شماری نا عبوری نتیجہ غاتے جاری کننگا۔ ملکی آبادی 1998 ءآن 2017 ءٹی 2.4 درسد نا سالانہ شرح نمو تون 20 کروڑ 77 لکھ 74ہزار مس۔ جمعہ نا دے شش میکو مردم وخانہ شماری نا عبوری نتیجہ غاک مشترکہ مفادات کونسل اٹی پیش کننگا ، ہراسرجم جاچ ئِ ہلنگ آن پد وزارت شماریات ئِ عبوری نتیجہ غاتا جاری کننگ نا موکل تس۔ مشترکہ مفادات کونسل پاکستان بیورو شماریات ئِ شش میکو مردم و خانہ شماری نا گڈیکو نتیجہ غاتے مرتب کننگ نا کاریم ترند کننگ نا پارت ہم کرے۔ جم اٹنگا آبادی ٹی ملک اٹی رہینگوک آ اوغان و ایلو درملکیک ہم اوار ئُ ہرا ہندی آبادی تون رہینگ انگ ئُ ولے داٹی رفیوجی ویلیج اٹی رہینگوک اوغان باہوٹ و سفارت کار اوار افس۔عبوری نتیجہ غاتا رداٹ ملکی آبادی ٹی 1998 ءنا نسبت 57 درسد ودکی مس وخت اس کہ 1981ءنا مردم شماری آن پد آن ملکی آبادی ٹی 146.6 درسد ودکی ریکارڈ کننگانے۔ قومی کہول آ و پنجاپ و سندھ انا صوبہ غاتیٹی آبادی نا شرح نمو ٹی کمتی بسنے وخت اس کہ خیبر پختونخوا ، بلوچستان و فاٹا نا آبادی ٹی ودکی ریکارڈ کننگانے۔ عبوری نتیجہ غاتارداٹ ملک انا جم اٹنگا آبادی ٹی نرینہ غاتا کچ 10 کروڑ 64لکھ 49 ہزار 322، زالبول نا کچ 10 کروڑ 13لکھ 14ہزار 780، ہنداوڑ خواجہ سراتا کچ 10ہزار 418ئِ۔ داوڑملکی آبادی ٹی 1998ءآن 2017ءٹی سالانہ اوسطاََ 2.40 درسد نا ودکی مسنے۔ پاکستان اٹی اُراتا جم اٹنگا کچ 3کروڑ 22لکھ 5ہزار 111مسنے۔ پاکستان نا خلقی علاقہ غاتیٹی اُراتا کچ 2کروڑ 12ہزار 797وخت اس کہ شارتیٹی اُراتا کچ 1کروڑ 21لکھ 92ہزار 314ئِ۔ خلقی علاقہ غاتا جم اٹنگا آبادی 13کروڑ 21لکھ 89 ہزار 531مسنے ہرا 2.23درسد سالانہ نا اوسط شرح نمو ئِ ظاہر کیک۔ شاری علاقہ غاتا جم اٹنگا آبادی 7کروڑ 55لکھ 84ہزار 989ئِ ہرا 2.70 درسد سالانہ نا شرح نمو ئِ ظاہر کیک۔ صوبہ خیبر پختونخوانا آبادی 3کروڑ 5لکھ 23ہزار 371وخت اس کہ اُراتا کچ 38لکھ 45ہزار 168ئِ۔ فاٹانا آبادی 50لکھ 1ہزار 676ئِ وخت ا س کہ اُراتا کچ 5لکھ 58ہزار 379ئِ۔ پنجاپ نا آبادی 11کروڑ 12ہزار 442نفوس آ تالان ئِ وخت اس کہ اُراتا کچ 1کروڑ 71لکھ 3ہزار 835ئِ۔ سندھ انا آبادی 4کروڑ 78 لکھ 86ہزار 51ئِ و اُراتا کچ 85لکھ 85ہزار 610ئِ۔ بلوچستان نا آبادی 1کروڑ 23لکھ 44ہزار 408و اونا اُراتا کچ 17لکھ 75ہزار 937ئِ۔ ہنداوڑ اسلام آباد کیپیٹل ٹیریٹری نا آبادی 20لکھ 6ہزار 572و اُراتا کچ 3لکھ 36ہزار 182ئِ۔ عبوری نتیجہ غاتارداٹ شاری آبادی ٹی ودکی نا رجحان 36.38درسد ئِ۔
