اسلام آباد۔24جولائی (اے پی پی): توانائی ءِ وفاقی وزیر سردار اویس احمد خان لغاری ءَ گوشت کہ ملک ءِ راجدپتر ءَ اولی رند ءَ ’’مسابقتی توانائی مارکیٹ پالیشی‘‘ آیوکیں دو ماہ ءَ وتی گڈی عملدرآمد ءِ بھر ءَ داخل بیت، ایشی ءَ پد حکومت بجلی ءِ گرگ ءَ را ھلاس کنت۔ وزیر توانائی ءَ اے گپ ورلڈ بینک ءِ میاں اوستمانی، شمالی افریقہ، اوگانستان ءُ پاکستان ءِ دمگی نائب صدر عثمان ڈائیون ءِ سروکی ءَ ورلڈ بینک ءِ مزن تک ءِ ڈل ءَ گوں گند ءُ نند ءِ ساھت ءَ کت۔ وفاقی وزیر برائے توان ءَ گوشت کہ ’’سی ٹی بی سی ایم‘‘ ءِ چیر دستی ءَ مارکیٹ ءَ بجلی ءِ آزاتیں تجارت ممکن بیت، اے ماڈل ءِ چیر دستی ءَ ’’وہیلنگ چارجز‘‘ ءُ ایندگر میکانزم ءِ بندات کنگ بوھگ ءَ اِنت ءُ حکومت ءِ کرد ایوک ءَ ریگولیٹری فریم ورک ءَ تاں محدود بیت۔ آئی ءَ اے گپ ءِ پدرائی کت کہ اے ٹرانزیشن کم کم ءَ ءُ یک جامع حکمت عملی ءِ چیر دستی ءَ کنگ بیت تانکہ نظام مھکم بہ بیت۔ گند ءُ نند ءِ ساھت ءَ سردار اویس لغاری ءَ ورلڈ بینک ءِ ڈل ءَ را حکومت ءِ توان ءِ اصلاحات، نیٹ میٹرنگ پالیشی، نجکاری، ریگولیٹری گہتری ءُ سرمایہ کاری ءِ موہ آنی بابت ءَ سرجمیں رنگ ءَ سرپد کت۔ آئی ءَ گوشت کہ پاکستان ءِ پالیسی ءِ جھل ءُ بُرزی نجی شعبہ ءِ دیمروئی ءُ شفافیت ءِ نیمگ ءَ ھاسیں رنگ ءَ انت ءُ ما لوٹ ایت کہ میاں اوستمانی سرمایہ کار ایشی ءِ تہ ءَ شریک بہ بنت۔ عثمان دیون ءَ پاکستان ءَ توان ءِ شوبگ ءَ بوھوکیں اصلاحات ساڑاتگ انت ءُ اے گپ ءِ سر ءَ زور پر داتگ کہ توان دیمروئی ءِ بنیات انت ءُ کجام ھم ملک ءِ دیمروئی ءِ واستہ توان ءِ شوبگ سک باز ارزشت ءِ واھند انت، ھمے ھاتر ءَ ورلڈ بینک اے شوبگ ءَ پاکستان ءِ کمک ءَ برجاہ دار ایت۔ آئی ءَ گوشت کہ مھکمیں، برجائی ءُ سرمایہ کاری دوستیں توان ءِ نظام ءِ دیمروئی ءِ واستہ ورلڈ بینک حکومت پاکستان ءِ گوما شانک ءَ اوشتاتگ۔ وفاقی وزیر ءَ ورلڈ بینک ءِ ڈل ءَ را اے شوبگ ءَ برجمیں اصلاحات ءِ سر ءَ یک سرجمیں کتابچہ ھم پیش کت ءُ امیت سہرا کت کہ آیوکیں وھد ءَ استیں شریکداری ءَ را گیش مھکم کنگ بیت۔
