تولیدی جان سلامتی، وانگ ءُ زانگ ءُ چاگردی ایمنی ءِ تہ ءَ سرمایہ کاری یک مھکمیں راج ءِ بُن ھشت اِنت، آبادی ءِ روچ ءِ درگت ءَ آصفہ بھٹو زرداری ءِ کلوہ

اسلام آباد۔11جولائی (اے پی پی): بانُک اول آصفہ بھٹو زرداری ءَ گوشت کہ ھمک مات ءِ جان سلامتی، ھمک زھگ ءِ رکھینگ ءُ ھمک ھاندان ءِ دیمروئی مئے راجی فرض اِنت، مئے دلگوشی اے گپ ءِ سر ءَ بہ بیت کہ ھمک مات جان سلامت بہ بیت، ھمک زھگ ایمن بہ بیت ءُ ھمک ھاندان ءَ دیمروئی ءِ موہ بہ رس ایت۔ صدارت ءِ پریس ونگ ءِ رد ءَ بانُک اول ءَ اے ھیالانی درشانی جھان ءِ آبادی ءِ روچ ءِ درگت ءَ وتی کلوہ ءِ تہ ءَ کت۔ آئی ءَ گوشت کہ پاکستان ءَ مات ءِ جان سلامتی، زھگ آنی گہبود ءُ ورنا آناں توانائی ءِ رد ءَ مزنیں چیلنج آنی دیم ءَ انت۔ آئی ءَ گوشت کہ تولیدی جان سلامتی، وانگ ءُ زانگ ءُ چاگردی سلامتی ءِ تہ ءَ سرمایہ کاری یک مھکمیں راج ءِ بُن ھشت اِنت، مارا اے گپ ءَ را دل یکیمی کنگ لوٹ ایت کہ ورنا آناں جوانیں وانگ ءُ زانگ، سرجمیں طبی آسراتی، اقتصادی موہ ءُ وتی زندمان ءَ گوں سیادی داروکیں پیسلہ آنی تہ ءَ بھر زوری ءِ رسگ ءَ را دل یکیمی کنگ لوٹ ایت۔ عاصفہ بھٹو زرداری ءَ گوشت کہ پرامن ءُ برجمیں پاکستان ءِ جوڑ کنگ ءِ واستہ ورنا آناں توانمند کنگ المی انت۔ آئی ءَ گوشت کہ پاکستان ءِ ورنائیں آبادی مئے انوگیں ءُ آیوکیں وھد اِنت، مرچی اے مارا بے نظیر بھٹو ءِ واب ءِ یات ءَ دنت کہ ہر زھگ ءَ را دوست ءُ دلگوش دیگ بہ بیت۔ عاصفہ بھٹو زرداری ءَ گوشت کہ آئی ءَ حکومت، سول سوسائٹی ءُ نجی شعبہ ءِ نیمگ ءَ چہ درستیں شریک آناں اپیل کتگ کہ آ یک انچیں آیوکیں وھد ءِ واستہ یکجائی ءَ کار بہ کن اَنت کہ ایشی ءِ تہ ءَ ھر جان ءِ ارزشت ءُ ھر نسل ءَ را بااختیار جوڑ کنگ بہ بیت۔