مزن وزیر محمد شہباز شریف ءِ پنت ءُ شون انت کہ ملک ءَ ای کامرس ءَ را گیش دیمروئی دیگ ءِ ھاتر ءَ کمیٹی جوڑ کنگ بہ بیت، پاکستانی کاروبار ءِ تہ ءَ گیشی ءِ ھاتر ءَ گامگیج چست کنگ بہ بیت

اسلام آباد۔10جولائی (اے پی پی): مزن وزیر محمد شہباز شریف ءَ سیادی داروکیں واکدار آناں پنت ءُ شون کتگ کہ آ ملک ءَ ای کامرس ءَ را گیش دیمروئی دیگ ءِ واستہ یک کمیٹی یے جوڑ بہ کن اَنت ءُ ای کامرس پلیٹ فارمز ءِ سر ءَ چیز آنی بہا کنگ ءِ پاکستانی کاروبار آنی تہ ءَ گیش گیشی ءِ واستہ گامگیج بہ زور اَنت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ علی بابا انٹرنیشنل ڈیٹا کامرس ءِ انٹرنیشنل مارکیٹنگ ءِ صدر جیمز ڈونگ ءِ سروکی ءَ شش باسکی ڈل ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر محمد شہباز شریف ءَ پنت ءُ شون کت کہ ملک ءَ ای کامرس ءَ را گیش دیمروئی دیگ ءِ واستہ کمیٹی جوڑ کنگ بہ بیت۔ مزن وزیر ءَ گوشت کہ اے وھد ءَ یک ءُ نیم لکھ ءَ چہ گیش پاکستانی علی بابا گروپ ءِ ای کامرس پلیٹ فارم آنی سر ءَ دمگی پیداوار ءِ چیز آناں بہا کنگ ءَ اَنت۔ آئی ءَ سیادی داروکیں واکدار آناں پنت ءُ شون کت کہ آ ای کامرس پلیٹ فارم آنی سر ءَ پاکستانی کاروباری ادارگ آناں چیز آنی بہا کنگ ءِ تہ ءَ گیش گیشی ءِ واستہ گامگیج بہ زور اَنت۔ مزن وزیر ءَ گوشت کہ نوکیں دور ءَ ای کامرس برآمدات ءِ تہ ءَ مزنیں گیشی ءِ مزنیں وسیلگ اِنت، ای کامرس برآمدات ءِ سروکی ءَ معیشت ءِ حکومت ءِ وژن ءِ سرجمی ءِ عمل ءِ تہ ءَ سک باز المی ئیں عنصر اِنت۔ جیمز ڈونگ ءَ ای کامرس ءِ وسیلگ ءَ میاں اوستمانی تک ءَ تجارت ءِ تہ ءَ پاکستانی کاروباری براتی ءِ کلیدی کرد ءَ را ساڑات۔ جیمز ڈونگ ءَ گوشت کہ اے وھد ءَ 1.5 ملین ءَ چہ گیش پاکستانی علی بابا ءِ ویب سائٹ ءِ سر ءَ دمگی پیداوار ءِ چیز آنی بہا کنگ ءَ اَنت ءُ پاکستانی ٹیکسٹائل ءِ چیز علی بابا ءِ پلیٹ فارم ءِ سر ءَ گیشتریں چیز آنی تہ ءَ ھوار اَنت۔ آئی ئَ گوشت کہ پاکستان ئَ ای کامرس ئِ تہ ئَ گیش مھکم کنگ ئِ بے کساسیں گنجائش است انت۔ جیمز ڈونگ ءَ علی بابا گروپ ءِ سر ءَ پاکستانی تاجر آنی کساس ءَ را گیش کنگ ءِ واستہ کاروباری مردم آنی ای کامرس ءِ تکنیک آناں کارمرد کنگ ءِ تہ ءَ ھم سک باز دلگوشی ءِ درشانی کتگ۔ گند ءُ نند ءَ آئی ٹی ءِ وفاقی وزیر شازہ فاطمہ خواجہ، چیئرمین ایف بی آر ءُ ہمگرنچیں ادارگ آنی مزنیں افسر آں ہم بہر زرتگ ات۔