مزن وزیر ءَ پاکستان نیشنل شپنگ کارپوریشن ءَ را یک میان استمانی سٹینڈرڈ شپنگ کمپنی جوڑ کنگ ءِ واستہ یک ٹوھیں منصوبگ ءِ پیش کنگ ءِ پنت ءُ شون

اسلام آباد۔10جولائی (اے پی پی):مزن وزیر محمد شہباز شریف ءَ پاکستان نیشنل شپنگ کارپوریشن ءَ را یک انٹرنیشنل اسٹینڈرڈ شپنگ کمپنی جوڑ کنگ ءِ واستہ یک سرجمیں منصوبگ ءِ پیش کنگ ءِ پنت ءُ شون کتگ ءُ گوشت کہ شپنگ ءِ شوبگ ءَ سرمایہ کاری ءِ مزنیں گنجائش است انت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر شہباز شریف ءِ سروکی ءَ نیشنل شپنگ کارپوریشن ءِ نوکیں رنگ ءَ جوڑ کنگ، اصلاحات، کارکردگی ءِ چار ءُ تپاسی ءُ آئی ءَ را انٹرنیشنل اسٹینڈرڈ شپنگ کمپنی جوڑ کنگ ءِ ھوالگ ءَ دیوان برجم دارگ بوت۔ گند ءُ نند ءَ بنجاھی وزیر احد خان چیمہ، جنید انور چوہدری ءُ سیادی داروکیں مزنیں حکام ءَ شریک بوتگ۔ مزن وزیر ءَ دیوان ءَ گوں تران کنان ءَ گوشت کہ پاکستان ءَ جہاز رانی ءِ شوبگ ءَ سرمایہ کاری ءِ مزنیں گنجائش است انت، جہاز رانی ءِ شوبگ ءَ نجی سرمایہ کاری ءِ دلبڈی ءِ واستہ یک سرجمیں منصوبگ جوڑ کنگ ءُ پیش کنگ بہ بیت، جہاز آنی کساس ءَ را گیش کنگ ءِ واستہ گامگیج چست کنگ بہ بیت ءُ کارگو ءِ واستہ پاکستان ءِ مقابلہ ءِ بنیات ءَ پی این ایس سی ءِ جہاز آناں کارمرد کنگ ءَ را دیمروئی دیگ بہ بیت۔ مزن وزیر ءَ پی این ایس سی ءَ را پنت ءُ شون کت کہ آ اے شوبگ ءَ را یک انٹرنیشنل اسٹینڈرڈ شپنگ کمپنی جوڑ کنگ ءِ واستہ اے شوبگ ءِ ماہرین ءُ مشیر آنی ازمت ءَ بہ زوریت۔ آئی ءَ گوشت کہ پاکستان نیشنل شپنگ کارپوریشن ءِ تہ ءَ اصلاحات ءَ چہ نہ ایوک ءَ جہاز رانی ءِ ھوالگ ءَ میاں اوستمانی کمپنی آناں داتگیں ارزشتی ایں درملکی زرّ ءِ بچت بیت بلکینگ ءَ دمگی دریائی جہاز رانی آنی واستہ روزگار ءِ موہ ھم گیش بنت۔ گند ءُ نند ءَ نیشنل شپنگ کارپوریشن ءِ تہ ءَ انوگیں جہاز آنی کساس، پاکستان ءَ سالانہ کارگو موومنٹ ءُ آیوکیں وھد ءَ پی این ایس سی ءِ گیشی ءِ بابت ءَ سرپد کنگ بوت۔ ایشی ءَ ابید پی این ایس سی ءِ کارروائیانی بابت ءَ ھم سرجمیں بریفنگ دیگ بوتگ۔