پاکستان ٹینس فیڈریشن ءِ صدر اعصام الحق قریشی ءَ محسن نقوی ءَ گوں گند ءُ نند

لاہور۔9جولائی (اے پی پی): پاکستان کرکٹ بورڈ ءِ چیئرمین محسن نقوی ءَ چار شمبے ءِ روچ ءَ پاکستان ٹینس فیڈریشن ءِ صدر اعصام الحق قریشی ءَ گوں گند ءُ نند کت۔ گند ءُ نند ءَ پاکستان ءَ ٹینس ءِ دیمروئی ءِ واستہ گامگیج آنی سر ءَ ھیال ریچی کنگ بوت۔ پی سی بی ءِ جارکش ءِ رد ءَ اعصام الحق ءَ اسلام آباد ءَ ٹینس کورٹ ءِ ھوالگ ءَ جیڈھ ءُ نوکیں ٹینس کورٹ ءِ نہ بوھگ ءِ بابت ءَ سرپدی داتگ ۔ محسن نقوی ءَ اسلام آباد ءَ ٹینس کورٹ ءِ ھوالگ ءَ جیڈھ آنی گیواری ءِ واستہ ھمگرنچیں واکدار آناں ہدایت داتگ ۔ پی سی بی ءِ چیئرمین محسن نقوی ءَ ٹینس ءِ گوازی ءِ دیمروئی ءِ واستہ ھرچ وڑیں کمک ءِ دل یکیمی دات ءُ گوشت کہ نوکیں ٹینس کورٹ ھم جوڑ کنگ بنت۔ پی سی بی ءِ چیئرمین محسن نقوی ءَ گوشت کہ کرکٹ ءِ وڑ ءَ پاکستان ءِ تہ ءَ ھم ٹینس ءِ تہ ءَ بے دروریں ٹیلنٹ است اِنت ءُ آئی ءِ واھشت اِنت کہ پاکستانی کھڈکار ٹینس ءِ تہ ءَ ملک ءُ قوم ءَ را شان ءُ شُہرت بیار اَنت۔ آئی ءَ گوشت کہ پیڈل ٹینس ءِ گوازی ھم ورنا آنی تہ ءَ مشہور بوھگ ءَ انت۔ ما پیڈل ٹینس ءِ نوکیں موہ آنی سرجمیں رنگ ءَ پائدگ چست کنگ ءِ واستہ ورنا آناں سرجمیں رنگ ءَ کمک کن ایں ۔ پی سی بی پاکستان ٹینس فیڈریشن ءِ گوما ہر وڑیں کمک ءِ واستہ تیار انت۔ اعصام الحق قریشی ءَ پی سی بی ءِ چیئرمین محسن نقوی ءَ را پاکستان ءَ آئی سی سی چیمپئنز ٹرافی ءِ کامیات برجم دارگ ءِ پد ءَ مبارکی دات۔ اعصام الحق ءَ ملک ءَ کرکٹ ءِ دیمروئی ءِ واستہ پی سی بی ءِ چیئرمین محسن نقوی ءِ کوشست آناں ساڑات۔ اعصام الحق ءَ پی سی بی ءِ چیئرمین محسن نقوی ءِ منت گپت کہ آئی ءَ ٹینس کورٹ ءِ ھوالگ ءَ جیڈھ آناں گیواری کتگ ءُ نوکیں ٹینس کورٹ جوڑ کنگ ءِ دل یکیمی داتگ۔ اے موہ ءِ سر ءَ پی سی بی ءِ چیف آپریٹنگ آفیسر سمیر احمد ھم ساڑی ات۔