راولپنڈی ۔8جولائی (اے پی پی): پنجاب ءِ سر وزیر مریم نواز شریف ءَ گشتگ کہ انڈر پاس ءُ فلائی اوور منصوبگ راولپنڈی ءِ الس ءِ واستہ گیم چینجر ثابت بنت۔ آئی ءَ راج ءِ آسراتی ءِ ھاتر ءَ جوڑ بوھوکیں منصوبگ آناں سرجم کنگ ءِ ھاتر ءَ درستیں ادارگ آنی کوشست آناں ستا کرتگ۔ سرجمیں پنجاب ءَ ساپیں آپ ءِ واستہ کسانیں ڈیم جوڑ کنگ ءِ گوما وانگ ءُ زانگ ءُ جان سلامتی ءِ سر ءَ ھاسیں دلگوشی دیگ بوھگ ءَ انت۔ آئی ءَ محرم الحرام ءِ وھد ءَ جوانیں سیکورٹی بندوبست کنگ ءِ ھاتر ءَ کانود ءِ نفاذ ءِ ادارگ آناں خراج تحسین پیش کتگ۔ راولپنڈی رنگ روڈ ءِ منصوبگ ھم زوت سرجم کنگ بیت۔ اے ھیالانی درشانی پنجاب ءِ سر وزیر مریم نواز شریف ءَ سئے شمبے ءِ روچ ءَ راولپنڈی ءَ نواز شریف فلائی اوور ءُ جی پی چوک انڈر پاس ءِ بنگیج کنان ءَ کت انت۔ اے موہ ءِ سر ءَ ریلوے ءِ وفاقی وزیر وفاقی وزیر ریلوے محمد حنیف عباسی ،پنجاب ءِ سینئر وزیر مریم اورنگزیب ،صوبائی وزیر صہیب احمد برتھ،وفاقی پارلیمانی سیکرٹری اطلاعات و نشریات بیرسٹر دانیال چوہدری،اراکین قومی اسمبلی ،طاہرہ اورنگزیب ،انجینئر قمر الاسلام،سینیٹر ناصر بٹ ،چیف سیکرٹری پنجاب ،اراکین صوبائی اسمبلی چوہدری نعیم اعجاز،عمران الیاس،لیگی رہنما جاوید اخلاص،آر پی او بابر سرفراز ،کمشنر خٹک،سی پی او سید خالد ہمدانی،سی ٹی او بینش فاطمہ ،اے ڈی سی جی حسن طارق ءُ اے دگہ ہمگرنچیں افسر ہم ساڑی بوتگ انت۔ پنجاب ءِ سر وزیر مریم نواز شریف ءَ راولپنڈی ءَ 8.77ارب کلدار ءِ میگا پروجیکٹ ءِ بنگیج کت۔ اڈیالہ روڈ نواز شریف فلائی اوور ءُ مال روڈ جی پی او چوک انڈر پاس ءِ باقاعدہ بنگیج کنگ بوتگ۔ مریم نواز ءِ آیگ ءِ سر ءَ الس ءَ پُل ءِ پنکھڑی ءِ ھئور کتگ وھدیکہ بنجاھی وزیر مریم نواز شریف ءَ وتی دست لہڑ کنان ءَ نعرہ آنی پسو داتگ۔ سی اینڈ ڈبلیو ءِ صوبائی وزیر ملک صہیب بھارت ءُ سیکرٹری سی اینڈ ڈبلیو سہیل اشرف ءَ بنجاھی وزیر ءَ را منصوبگ آنی بابت ءَ سرپدی دیگ ءِ وھد ءَ راولپنڈی ءَ 607کلومیٹر ءِ دراجیں 67 سڑک منصوبگ بندات کنگ بوتگ ءُ انوگ ءَ تاں 51 سڑک منصوبگ سرجم کنگ بوتگ انت۔ نواز شریف فلائی اوور ءُ جی پی او انڈر پاس ءَ چہ 3لکھ ءِ کساس ءَ گاڑی گوزگ ءَ انت۔ اڈیالہ روڈ ءِ سرا کچری چوک ءَ چہ بندات بوؤکیں نواز شریف فلائی اوور ءَ چہ جی ٹی روڈ رنگ روڈ ءُ چکری انٹرچینج موٹروے ءَ چہ گوزوکیں ٹریفک ءَ را فائدگ رسیت۔ نواز شریف انٹرچینج ءِ سر ءَ سفر کنگ ءَ چہ الس ءَ یک کلاک ءَ چہ گیش وھد ءُ پٹرول ءُ دگہ لکاں کلدار ءِ بچت بیت۔ نواز شریف فلائی اوور ءَ چہ گورکھ پور، اڈیالہ، خالصہ کھرد، خالصہ کلان، دھلان، جرار کیمپ، ڈھوک اعوان، سنگرل ءُ اے دگہ آبادی آنی ٹریفک ءَ را سیت رسیت۔ نواز شریف فلائی اوور ءِ کش ءُ گور ءَ دو کلومیٹر ءِ سروس روڈ ھم جوڑ کنگ بوتگ وھدے کہ راولپنڈی مال روڈ ءِ سر ءَ جی پی او چوک ءُ ٹی ایم چوک سگنل فری راہداری ءَ چہ ھمک روچ دو سد ھزار ءَ چہ گیش گاڑی گوزگ ءَ اَنت۔ لس مھلوک ءِ آسراتی ءِ واستہ اے ایف آئی سی ءِ نزیک ءَ اے منصوبگ ءِ تہ ءَ پیادگ آنی واستہ انڈر پاس ھوار کنگ بوتگ اَنت ءُ اولی رند ءَ جی پی او انڈر پاس منصوبگ ءِ تہ ءَ نوکیں انٹیلی جنس سگنل سسٹم ایر کنگ بوتگ۔ مال روڈ ءِ سر ءَ جوڑ کنگ بوھوکیں تقریباً دو کلومیٹر ءِ انڈر پاس ءَ چہ کشمیر روڈ ءِ وسیلگ ءَ نیشنل ہائی وے این فائی ءَ را آسانی ءَ سر بیت۔ جی پی او چوک انڈر پاس ءَ چہ روچے سی ایم ایچ، ایم ایچ ءُ اے ایف آئی سی ءَ آیوکیں نادراہ آناں ھم آسراتی دیگ بیت۔ جی پی او چوک انڈر پاس ءَ چہ صدر بازار، یلو اسٹیشن ءُ دگہ دمگاں چہ گوزوکیں ٹریفک ءَ را ھم آسراتی دیگ بیت۔ افتتاحی مراگش ءَ گشتانک دیان ءَ پنجاب ءِ سر وزیر مریم نواز شریف ءَ گوشت کہ الس ءِ آسراتی ءِ واستہ درستیں دیمروئی منصوبگ اولی ترجی انت، ءُ کچہری روڈ ءُ مال روڈ ءِ ریموڈلنگ ھم کنگ بیت۔ راولپنڈی ءَ انڈر پاس منصوبہ ءِ وسیلگ ءَ سڑک ءَ را سگنل فری جوڑ کنگ بوتگ۔ آئی ءَ گوشت کہ راولپنڈی ءَ ھوار سرجمیں پنجاب ءَ ساپیں آپ ءِ منصوبگ بندات کنگ بنت، ءُ کسانیں ڈیم جوڑ کنگ بنت۔ مریم نواز ءَ گوشت کہ پنجاب ءِ سرجمیں وانگ ءُ زانگ ءِ ادارگ آنی ھوار 1250 جاندراھی مراگش آناں نوک کنگ بوھگ ءَ انت۔ مریم نواز ءَ گوشت کہ انوگ ءَ تاں پنجاب ءَ 12 ہزار کلومیٹر سڑک جوڑ کنگ ءِ منصوبگ سرجم بوتگ، وھدیکہ لھتیں ہفتگ آنی تہ ءَ 19 ہزار کلومیٹر سڑک ءِ منصوبگ سرجم بوتگ انت۔ مریم نواز ءَ گوشت کہ پنجاب ءِ ھمک شہر ءَ سیوریج ءِ نظام گہتر کنگ بیت۔
