اسلام آباد۔6جولائی (اے پی پی): بنجاھی وزیر کانود، انصاف ءُ انسانی حقانی اعظم نزیرتارڑ ءَ حضرت امام حسین ءُ آئی ءِ دلبڈی ءِ ھمراہ آناں شگر ءُ منت گپت کہ آہاں کربلا ءِ جنگ ءِ میدان ءَ راستی، انصاف ءُ انسانیت ءِ مزنیں قدر ءُ قیمتانی ھاتر ءَ بے دروریں قربانی داتگ۔ عاشورہ ءِ روچ ءِ موہ ءَ وتی کلوہ ءِ تہ ءَ اعظم نزیرتارڑ ءَ گوشت کہ ما امام حسین (رضی اللہ عنہ) ءُ آئی ءِ مزنیں ھمراہ آنی بے مٹیں قربانی ءَ را سلام پیش کن ایں، کہ آھاں کربلا ءَ راستی، انصاف ءُ انسانیت ءِ عزت ءِ واستہ داتگ۔ آئی ءَ گوشت کہ کربلا ءِ سانحہ ایوک ءَ گوست ءِ واقعہ نہ انت بلکیں ظلم ءِ ھلاپ ءَ مھکم اوشتگ، اخلاقی جرات ءِ درشان کنگ ءُ اصول آنی سر ءَ سمجھوتہ نہ کنگ ءِ ابدمانیں سبق انت۔ امام حسین (ر) ءَ ظلم ءِ دیم ءَ جھکگ ءِ بدل ءَ شھید ءَ را گیشتر دوست داشتگ کہ اے مدام انسانیت ءَ را یات دنت کہ دروگ ءِ دیم ءَ بے توار بوھگ چو راستی ءِ راہ ءَ پشت ءِ کشگ ءَ اِنت۔ وزیر ءِ کانود ءَ گوشت کہ کربلا ءِ کلوہ جہانی انت۔ اے مارا صبر، استقامت، ہمت ءُ قربانی ءِ وڑیں قدر ءُ قیمتاں وتیگ کنگ ءِ سکین دنت کہ آ ہر عادلانہ ءُ انسانی چاگرد ءِ بُن ہشت انت۔ ما یک راجے ءُ یک مردمے ءِ بستار ءَ اے وانینگانی سرا ھیال ءُ لیکہ بہ کنیں ءُ انصاف ءِ برجاہ دارگ ءِ وعدہ بہ کنیں، زلم ءُ زوراکی ءِ ھلاپ ءَ وتی توار ءَ چست بہ کنیں ءُ ھر پڑ ءَ نزوریں مردمانی ھمراھی ءَ بہ کنیں۔ آئی ءَ گوشت کہ اے مقدسیں روچ ءَ ما اے قدر ءُ قیمت آناں وتی انفرادی ءُ اجتماعی زند ءِ بھر جوڑ کنگ ءِ عہد ءَ بہ کن ایں ۔ ما وتی عزم ءَ پدا پدر کنیں کہ یک انچیں چاگردے ءِ جوڑ کنگ بہ بیت کہ اودا راستی ءِ بادشاہی بہ بیت، انسانی حقانی رکھینگ بہ بیت ءُ چہ ترس ءَ کس ءِ توار سرکوب کنگ مہ بیت۔
