اسلام آباد۔6جولائی (اے پی پی):اسلام آباد دارالحکومت ءِ پولیس ءَ 10 محرم ءِ واستہ ہائی الرٹ سیکورٹی پلان جوڑ کتگ۔ اے عاشورہ ءِ روچ ءَ 12 جلوس ءُ 48 مذہبی مجلس آنی ایمنی ءِ ھاتر ءَ فدرال دارالحکومت ءَ چہ گیش 4000 پولیس افسر ءُ کارندہ ایر کنگ بوتگ انت۔ اسلام آباد پولیس ءِ کارندہاں گشتگ کہ آئی جی سید علی نصیر رضوی سرجمیں ضلع ءِ تہا سیکورٹی بندوبست آنی سر ءَ ذاتی رنگ ءَ نگرانی کنگ ءَ انت کہ ایشی ءِ تہ ءَ ڈی آئی جی، ایس ایس پی ءُ ایس پی ءَ ھوار مزنیں افسر سیکورٹی آپریشن ءِ سر ءَ نگرانی کنگ ءَ انت۔ آئی جی ءَ گشتگ کہ جلوس ءُ مچی آنی رکھینگ ءِ ھاتر ءَ سرجمیں اسلام آباد ءَ کل 57 سیکورٹی پوسٹ جوڑ کنگ بوتگ انت۔ آئی ءَ گوشت کہ ٹریفک ءِ روانی ءَ را دل یکیمی کنگ ءُ الس ءِ کمک ءِ واستہ 300 ءَ چہ گیش ٹریفک افسر ھم ایر کنگ بوتگ انت۔ آئی جی سید علی نصیر رزوی ءَ گوشت کہ سیف سٹی سرویلنس، باڈی کیمرہ، ڈرون ءِ ھوار موبائل ءُ سینٹرل کنٹرول روم دوئیں آنی وسیلگ ءَ سرجمیں سیکورٹی آپریشن آنی سر ءَ نگرانی کنگ بوھگ ءَ اِنت۔ آئی ءَ گوشت کہ 9محرم ءَ تاں سرجمیں اسلام آباد ءَ پیسر ءَ چہ 76جلوس ءُ 498مچی آنی سیکورٹی بندوبست سوبمندیں رنگ ءَ کنگ بوتگ۔ آئی جی ءَ گوشت کہ موسم ءِ گرانیں جاور ھال آنی باوجود اسلام آباد پولیس ءِ ھر افسر ءُ کارندہ وتی ذمہ واری آنی تہ ءَ جزم ءُ سک باز دلگوش انت۔
