لاہور۔5جولائی (اے پی پی):نائب مزن وزیر ءُ سینیٹر اسحاق ڈار ءَ گشتگ داتا دربار ءِ نوک جوڑی ءِ کار گوں ترندی ءَ دیم ءَ روان انت ءُ گنبد برز کنگ بوتگ ۔ مدینہ منورہ طرز ءِ چھتری ھم مسیت ءَ ایر کنگ بنت کہ پنجاب ءِ سر وزیر مریم نواز ءَ باقاعدہ اجازت داتگ۔ آ شمبے ءِ روچ ءَ داتا دربار ءَ غسل مراگش ءَ پد میڈیا ءَ گوں گپ ءُ تران کنگ ءَ ات۔ اسحاق ڈار ءَ مزن وزیر شہباز شریف، صدر آصف علی زرداری، ن لیگ ءِ راہشون نواز شریف ءُ بنجاھی وزیر مریم نواز ءَ را داتا دربار ءِ نوک کنگ ءِ بندات ءِ سر ءَ مبارکی دات ءُ گوشت کہ امیت انت دیم ءِ غسل ءَ پیسر داتا دربار ءِ جوڑیشت ءِ کار سرجم کنگ بنت۔ آئی ءَ گوشت کہ اے منصوبگ ءِ اولی بنگیج 31 مئی 1999ءَ محمد نواز شریف ءَ کتگ، نوں اے منصوبگ سرجم کنگ بوھگ ءَ انت۔ آئی ءَ گوشت کہ محمد شہباز شریف ملک ءِ دیمروئی ءِ واستہ شپ ءُ روچ کار کنگ ءَ انت، ایشی ءِ سبب ءَ مارا بے دروریں سوبمندی رستگ۔ ہندوستان ءِ گوما جنگی جاورحالانی سرا تران کنان ءَ نائب مزن وزیر ءَ گشتگ کہ ہندوستان ءَ فضائی جنگ بندات کتگ بلے پاکستان ءَ شش بالی گراب ایر جتگ۔ آئی ءَ گوشت کہ بھارت ءَ 36کلاک آنی تہ ءَ 80 ڈرون روان داتگ، ایشی ءِ سر ءَ پاکستان ءَ لائکیں پسو داتگ، پاکستان ءَ را جھان ءِ تک ءَ عزت، عزت ءُ سوبمندی رستگ۔ آئی ءَ گوشت کہ پاکستان دوسال ءِ واستہ اقوام متحدہ ءِ سلامتی کونسل ءِ باسک ءِ بستار ءَ گچین کنگ بوتگ، اے راجدپتری سنگ انت۔ ایران ءِ گوما سیادی ءِ بابت ءَ گپ جنان ءَ اسحاق ڈار ءَ گوشت کہ پاکستان ءَ اسرائیل ءِ ناشرکاری ءِ حلاف ءَ سفارتی تک ءَ ایران ءِ کمک کتگ، ایشی ءِ سر ءَ ایران ءَ پاکستان راستیں دوست لیک اتگ، ایران ءِ پارلیمنٹ ءَ پاکستان ءِ حق ءَ نعرہ ھم جنگ بوتگ انت۔ نائب مزن وزیر ءَ گوشت کہ پاکستان ءِ گور ءَ جنگی ایجنڈا نیست، مارا امن ءُ ایمنی ءُ دمگ ءِ برجائی لوٹ ایت۔ آئی ءَ گوشت کہ استیں حکومت ءِ مستریں ایجنڈا اقتصادی گہتری انت، ایشی ءِ سر ءَ شپ ءُ روچ کار بوھگ ءَ انت۔ آئی ءَ گوشت کہ آذربائیجان ءِ گوما دو ارب ڈالر ءِ معاہدہ کنگ بوتگ، مہنگائی کم بوتگ ءُ سود ءِ شرح 22درسد ءَ چہ 11درسد ءَ اتکگ، دیمروئی ءِ راہ پچ بوتگ، ءُ الس ءِ سرجمیں آمدنی ھم گیش بیت۔ سیاسی جاورھالانی بابت ءَ گپ جنان ءَ اسحاق ڈار ءَ گوشت کہ پیپلز پارٹی ءَ ھچ وڑیں وزارت ءُ واھشت ءِ درشان نہ کتگ، اے یک اتحادی پارٹی یے ءُ مشکلیں وھد ءَ ھمکار یلہ کنگ نہ بنت، دوئیں پارٹی آنی یکجائی ملک ءُ قوم ءِ نپ ءَ انت۔ آئی ءَ گوشت کہ کانود وتی راہ ءَ وت جوڑ کنت، مردم افواہ ءُ اسپانسریں ھال آنی تہ ءَ گمراہ کنگ مہ بیت، آ درستیں فریق آنی گوما یکجائی ءَ چہ رھادگ بوھگ لوٹ ایت۔ کرپشن خیبرپختونخوا بہ بیت یا کجام ھم صوبہ ءَ ہلاس کنگ بہ بیت۔ اسحاق ڈار ءَ گوشت کہ پاکستان ڈیفالٹ ءِ سر ءَ انت بلے وھد ءِ سر ءَ پیسلہ کنگ مہ بوتیں گڈا ملک ڈیفالٹ بوتگ ات ۔ نوں زرّ ءِ ذخیرہ 14 ارب ڈالر ءَ سر بوتگ۔ آئی ءَ گشتگ کہ پاکستان ءُ ہندوستان ءِ نیام ءَ جنگ بندی جاہ ءَ انت، ہندوستان ءِ بیاناں چہ ترسگ ءِ ہچ ضلورت نہ انت۔ گوست ءَ ھم سوب مند بوتگ اَنت ءُ آیوکیں وھد ءَ ھم سوب مند بنت۔ سعودی عرب ءِ گوما جنرل ویزہ ءِ جیڈھ ءَ را گہتر کنگ بوھگ ءَ انت۔ اے درگت ءَ ھپت ءُ ھشت ماہ اِنت کہ گپ ءُ تران بوھگ ءَ اِنت ءُ اے لوٹ اِنت کہ نیلیں پاسپورٹ ءِ واھنداں ھم ھاسیں رسائی دیگ بہ بیت۔
