
اسلام آباد۔4جولائی (اے پی پی): وفاقی تہی کارانی وزیر محسن نقوی ءَ امریکی راج، قائم مقام امریکی سفیر نیٹلی بیکر ءُ سفارتی کارندہ آناں امریکہ ءِ آجوئی ءِ روچ ءِ مبارک بات داتگ ءُ امریکی حکومت ءُ راج ءِ واستہ وتی نیکیں واھگ آنی درشان کتگ۔ وزارت داخلہ ءِ نیمگ ءَ جاڑی بوتگیں بیان ءِ رد ءَ وزیر داخلہ محسن نقوی ءَ امریکی حکومت ءُ الس ءِ واستہ نیکیں واھگ آنی درشان کت ءُ گوشت کہ آجوئی ءِ روچ ءَ امریکی الس ءِ وشیاں یک پیم ءَ بھر زور اَنت۔ محسن نقوی ءَ گوشت کہ امریکہ ءِ آجوئی ءِ روچ قربانی ءِ درشان اِنت ءُ جمہوریت ءِ مزنیں بستار اِنت، آجوئی انسانی پجار، حاکمیت ءُ شرپ ءِ علامت اِنت۔ محسن نقوی ءَ گوشت کہ امریکی صدر ڈونلڈ ٹرمپ ءِ سروکی ءَ امریکا دیمروئی ، یکوئی ءُ امن ءِ کشک ءَ انت ۔ آئی ءَ گوشت کہ امریکی صدر ڈونلڈ ٹرمپ ءَ دگنیا ءَ برجائی امن ءِ واستہ مثالی کرد پیلو کتگ ءُ پیلو کنگ ءَ انت، امیت انت کہ امریکی صدر ڈونلڈ ٹرمپ ءِ دور ءَ دیریں چہ جہانی جیڈھ آناں گیش ءُ گیوار کنگ بیت۔ محسن نقوی ءَ گوشت کہ پاکستان ءُ بھارت ءِ جیڈھ ءِ تہ ءَ صدر ٹرمپ ءِ کرد اعتدال پسند، رھشونی ءُ زانتکاریں سروکی ءِ مثال اِنت۔ آئی ءَ گوشت کہ پاکستان ءُ بھارت ءِ کش ءُ چیل ءِ تہ ءَ امریکی صدر ڈونلڈ ٹرمپ ءِ جوڑیشت ءِ کرد مدام یات ءَ دارگ بیت۔ تہی کارانی وزیر ءَ گوشت کہ وائٹ ھاوس ءَ فیلڈ مارشل سید عاصم منیر ءِ شرپ ءَ صدر ڈونلڈ ٹرمپ ءِ نیمگ ءَ داتگیں راجدپتری نان ءِ ورگ پاک امریکہ ءِ سیادی آنی واستہ نوکیں بنیات اِنت۔ محسن نقوی ءَ گوشت کہ پاکستان ءُ بھارت ءِ کش ءُ چیل ءِ وھد ءَ پاک امریکہ ءِ سیادی ءَ را نوکیں رنگ ءُ دروشم رستگ ءُ وت مہ وتی کمک ءَ را مھکم کنگ بوتگ۔ آئی ءَ گوشت کہ بحران ءِ ساھت آنی تہ ءَ واشنگٹن ءِ متوازن حکمت عملی ءَ چہ دو نیمگی سیادی آنی تہ ءَ بھروسہ ءُ شرپ ءِ تہ ءَ گیشی بوتگ۔ محسن نقوی ءَ گوشت کہ 4جولائی امریکی الس ءِ واستہ نوکیں جزم، دلیری ءُ یکوئی ءِ روچ اِنت۔ من دعا کناں کہ امریکہ ءِ 249می آجوئی ءِ روچ دنیا ءِ تہا انصاف، آجوئی ءُ امن ءِ نوکیں پیغام ثابت بہ بیت۔