خانکندی۔4جولائی (اے پی پی): مزن وزیر محمد شہباز شریف ءَ ایشیائی یوتھ گرلز نیٹ بال چیمپئن شپ 2025ءَ پاکستان ءِ سوبمندی ءِ سر ءَ ٹیم ءُ راج ءَ را مبارک بات دیگ ءَ گوشت کہ اے سوبمندی سرجمیں راج ءِ واستہ یک فخر ءِ ساھت ءُ پاکستانی زالبول آنی واستہ کھیڈ آنی تہ ءَ یک دگہ مزنیں سنگ میل اِنت۔ جمعہ ءِ روچ ءَ ”ایکس“ ءِ سر ءَ وتی پوسٹ ءِ تہ ءَ مزن وزیر ءَ ٹیم ءَ را جوانیں کارکردگی ءِ سر ءَ مبارک بات داتگ۔ آئی ءَ ٹیم ءِ سرجمیں ٹورنامنٹ ءَ ناقابل شکست بوھگ ءِ ھاتر ءَ ھم ھاسیں رنگ ءَ توسیپ کتگ۔ زانگ بہ بیت کہ ایشیائی یوتھ گرلز نیٹ بال چیمپئن شپ ءَ پاکستان ءَ جوانیں کارکردگی پیش داشتگ ءُ فائنل ءَ مالدیپ ءَ را ہلاس کتگ ءُ ٹائٹل زرتگ۔
