خانکندی۔4جولائی (اے پی پی): اقتصادی کمک ءِ گل ءِ 17می سروک دیوان ءِ موہ ءَ مزن وزیر محمد شہباز شریف ءَ آذربائیجان ءِ صدر الہام علیوف ءِ گوما دو نیمگی گند ءُ نند کت۔ مزن وزیر ءَ آذربائیجان ءِ صدر ءَ را 17می ایکو سروک دیوان ءِ مثالی میزبانی ءِ پد ءَ مبارکی دات۔ مزن وزیر کارگس ءِ پریس ونگ ءِ نیمگ ءَ چہ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ 27 ءَ بگر تا 29 مئی 2025 ءَ آزربائیجان ءِ شہر لاچین ءِ استیں تر ءُ تاب ءِ ساھت ءَ پاکستانی ڈل ءِ جوانیں مہمان جھلی ءِ پد ءَ صدر علیوف ءُ آزربائیجان ءِ الس ءَ گوں دل وشی ءِ درشان کت۔ مزن وزیر ءَ بھارت ءِ استیں کشاں چیل آنی ساھت ءَ پاکستان ءِ واستہ آزربائیجان ءِ آیوکیں باندات ءِ کمک ءِ پد ءَ صدر الہام ءِ شگر ءُ منت واری گپت ۔ مزن وزیر ءَ گوشت کہ پاکستان ءَ ھم مشکلیں ساھت ءَ آذربائیجان ءِ مُدام کمک کتگ۔ گند ءُ نند ءِ ساھت ءَ دوئیں بامرد آں دوئیں ملک آنی نیام ءَ سرمایہ کاری ءِ موہ آنی رد ءَ پیشرفت ءِ سر ءَ دل یکیمی ءِ درشان کت ءُ بیپار ءُ سرمایہ کاری ءِ شوبگ آنی تہ ءَ کمک ءَ را گیش کنگ ءِ سر ءَ تپاک کت۔ دوئیں رہشوناں اقتصادی شریکداری ءَ را گیش وسعت دیگ ءِ ھاتر ءَ وتی عزم ءِ پدا زور دات، ھاسیں رنگ ءَ آذربائیجان ءِ پاکستان ءَ سرمایہ کاری ءَ را گیش ءُ گیوار کنگ ءِ ھاتر ءَ۔ مزن وزیر ءَ گوشت کہ دوئیں ملک آنی سروکی ءِ نیام ءَ گوستگیں گپ ءُ تران ءَ چہ دو نیمگی سیادی ءَ را گیش مھکم کنگ ءَ کمک رستگ۔ مزن وزیر ءَ صدر الہام ءَ را زوت پاکستان ءِ تر ءُ تاب ءِ دعوت ءِ ھم پدا زور دات۔
