سیویل۔3جولائی (اے پی پی):وفاقی وزیر خزانہ سینیٹر محمد اورنگزیب ءَ اسپین ءِ شہر سیویل ءَ دیمروئی ءِ واستہ مالی کمک ءِ چارمی میاں اوستمانی کانفرنس ءِ ساھت ءَ جتا جتائیں ملک ءُ میاں اوستمانی ادارگ آنی گوما مزن تک ءِ دو نیمگی گند ءُ نند کت۔ اے گند ءُ نند آنی مول ءُ مراد دیمروئی مالیات، تجارت، چاگردی برجائی ءُ ادارگی اصلاحات ءِ وڑیں پڑ آنی تہ ءَ پاکستان ءِ شریکداری ءَ را گیش مھکم کنگ بوتگ۔ وزیر ءِ ھزانگ نا ایوک ءَ کانفرنس ءِ مستریں سیشن آنی تہ ءَ پاکستان ءِ نمائندگی ءَ کنگ ءَ اِنت بلکینگ ءَ جتا جتائیں سائیڈ سیشن، پالیسی ءِ گپ ءُ تران ءُ شریکداری ءِ راؤنڈ ٹیبل ءِ سر ءَ گپ ءُ تران آنی تہ ءَ ھم کنگ ءَ اِنت۔ دو نیمگی گند ءُ نند آنی رد ءَ وزیر ءِ ھزانگ محمد اورنگزیب ءَ ہالینڈ ءِ وزیر ءِ ھزانگ ایلکو ہائینن ءِ گوما سرجمیں گند ءُ نند کت ایشی ءِ تہ ءَ دوئیں ملک آنی نیام ءَ دیریں ءُ دوستی ءِ سیادی ءَ را گیش وسعت دیگ ءِ سر ءَ تران کت۔ گند ءُ نند ءِ تہ ءَ بیپار، دیمروئی کمک، موسمیاتی تابکاری ءُ ادارگی صلاحیت سازی ءِ وڑیں سرھال آنی سر ءَ گپ ءُ تران کنگ بوت۔ گند ءُ نند ءِ ساھت ءَ پاکستان ءَ کشت ءُ کشاری ءِ تہ ءَ نوکیں ٹیکنالوجی، آبی وسیلگ آنی بندوبست ءُ سرکاری ازمت آنی ڈیجیٹلائزیشن ءِ وڑیں شوبگ آنی تہ ءَ ہالینڈ ءِ مہارت ءَ چہ سیت چست کنگ ءِ واھشت ءِ درشان کت۔ وزیر خزانہ ءَ ہالینڈ ءِ منت گپت کہ آ پاکستان ءَ را جتا جتائیں شوبگ آنی تہ ءَ ھاسیں رنگ ءَ سرکاری مالیاتی انتظامی، ایس ایم ای ءِ دیمروئی، قابل تجدید توانائی ءُ ایکولوجیکل کشت ءُ کشاری ءِ دیمروئی ءِ واستہ کمک ءِ تہ ءَ برجاھیں مالی ءُ تکنیکی کمک کنگ ءَ انت۔ ہالینڈ ءِ وزیر ءَ پاکستان ءِ اصلاحات ءِ ایجنڈا ءِ حمایت ءِ یک رندے پدا پالیشی ءِ تسلسل، شفافیت ءُ سرمایہ کاری ءِ دلبڈی ءِ سر ءَ زور پر دات۔ وزیر خزانہ ءَ تر ءُ تاب ءِ ساھت ءَ ورلڈ بینک ءِ سینئر منیجنگ ڈائریکٹر ایکسل وان ٹروٹسنبرگ ءَ گوں گند ءُ نند کت۔ گند ءُ نند ءِ ساھت ءَ وزیر ءِ ھزانگ ءَ پاکستان ءِ دیمروئی ایجنڈا ءِ واستہ ورلڈ بینک ءِ نیمگ ءَ برجاھیں کمک ءِ ساڑات ءُ آئی ایم ایف ءِ ای ایف ایف پروگرام ءِ سوبمندیں چار ءُ تپاسی ءُ لچک ءُ پائیداری آسراتی (آر ایس ایف) ءِ چیر دستی ءَ جاری اصلاحات ءِ بابت ءَ سرپدی دات۔ آئی ءَ نیشنل گرین ٹیکسونومی ءِ بندات ءِ ھم گپ جتگ کہ اے ورلڈ بینک ءِ کمک ءَ تیار کنگ بوتگ۔ گند ءُ نند ءِ ساھت ءَ وزیر ءِ ھزانگ ءَ حکومت پاکستان ءُ ورلڈ بینک ءِ نیام ءَ آیوکیں 10سالی ملکی شراکت داری فریم ورک ءِ منظوری ءَ را وش اتک کت ایشی ءِ تہ ءَ زھگانی نادراھی، وانگ ءُ زانگ، چاگردی رکھینگ، مالیاتی وسیلگ آنی تہ ءَ گیشی، کاربن ءِ تہ ءَ کمی ءُ نجی ءِ وڑیں کلیدی شوبگ ھوار اَنت۔ آئی ءَ اے فریم ورک ءِ جوانیں رنگ ءَ عمل درآمد ءُ پائیدار دیمروئی ءِ مول ءُ مراد آنی سرجمی ءِ واستہ ورلڈ بینک ءِ گوما نزیکی ءَ کار کنگ ءِ وتی جزم ءِ پدا پدر کت۔ تر ءُ تاب ءِ ساھت ءَ وزیر خزانہ سینیٹر محمد اورنگزیب ءَ اقوام متحدہ ءِ ماتیں کمپنی ءِ زرعی دیمروئی ءِ ھاتر ءَ انٹرنیشنل فنڈ ءِ صدر الوارو لاریو ءَ گوں ھم گند ءُ نند کتگ کہ آ میتگ ءِ دیمروئی ءُ فوڈ سسٹم ءِ اصلاحات ءِ سر ءَ کار کنگ ءَ انت۔ گند ءُ نند ءَ پاکستان ءُ آئی ایف اے ڈی ءِ نیام ءَ دیریں سیادی ءِ سر ءَ چار ءُ تپاسی کنگ بوت کہ ایشی ءِ چیر دستی ءَ تاں انوگ ءَ 29منصوبگ سرجم کنگ بوتگ انت ایشی ءَ چہ نزیک ءَ 2.8ملین دیہی لوگ آناں فائدگ رستگ۔ وزیر ءِ ھزانگ ءَ آئی ایف اے ڈی ءِ کمک ءَ چہ پاکستان ءَ 6 منصوبگ آنی سر ءَ عمل کنگ بوھگ ءَ انت ایشانی ھم گپ کت ءُ آوانی ازمت آناں ساڑات۔ گند ءُ نند ءَ پالیسی ءِ کمک، پیشہ وارانہ تربیت، کمیونٹی انفراسٹرکچر، مالی رسائی، ایکولوجیکل زراعت، ویلیو چین ءِ دیمروئی ءُ موسمیاتی جھٹکا ءِ ھلاپ ءَ تابکاری ءِ وڑیں منصوبگ آنی سر ءَ ھیال ریچی کنگ بوت۔ وزیر خزانہ محمد اورنگزیب ءَ انٹرنیشنل چیمبر آف کامرس ءِ سیکرٹری جنرل جان ڈینٹن ءَ گوں ھم گند ءُ نند کت۔ اے موہ ءِ سر ءَ پاکستان ءِ تجارت ءِ آسراتی، ایس ایم ای ءِ دیمروئی، سرمایہ کاری ءِ دیمروئی ءُ پاکستان ءِ معیشت مٹ کنگ ءِ واستہ آئی سی سی ءِ کرد ءِ سر ءَ گپ ءُ تران کت۔ اے گند ءُ نند آنی ساھت ءَ پاکستان ءَ پائیدار ءُ ھواریں دیمروئی ءِ واستہ نوکیں موہ پیداک کنگ ءِ واستہ نجی شوبگ ءِ ھوار بوھگ، جھان ءِ جوانیں کار ءُ کرد ءُ ادارگی گنجائش ءَ را گہتر کنگ ءِ وڑیں پڑ آنی سر ءَ ھم زور پر دیگ بوت۔ اے دو نیمگی گند ءُ نند ءِ تہ ءَ پاکستان ءِ دیمروئی ءِ مول ءُ مراد ءِ رد ءَ اقتصادی اصلاحات، دیمروئی ءِ مالیات ءُ میاں اوستمانی شریکداری ءِ دیمروئی ءِ عزم ءِ درشان کنگ بیت۔
