اسلام آباد۔3جولائی (اے پی پی): پنچ شمبے ءِ روچ ءَ لوک ورسا ءِ ایگزیکٹو ڈائریکٹر ڈاکٹر وقاس ءَ راجی ورثہ ءُ دود ءُ ربیدگ ءِ وفاقی وزیر محمد اورنگزیب کھچی ءَ را ادارگ ءِ تہ ءَ برجاھیں دیمروئی کار آنی ھوالگ ءَ سرجمیں رنگ ءَ سرپد کت۔ گند ءُ نند ءَ لوک ورسا ءَ سیل ءُ سواد ءِ دلگوشی ءَ را گیش کنگ ءِ واستہ جتاجتائیں پراجیکٹس، کلچرل امیج ءُ نوکیں پروگرام آنی سر ءَ ھم ھیال ریچی کنگ بوت۔ ای ڈی ءَ گوشت کہ لوک ورسا ءَ آرٹس ءُ کرافٹ ءِ کلاس بندات بوتگ انت، وھدیکہ ڈانس ءُ موسیقی ءِ کلاس ھم زوت بندات کنگ بنت۔ راجی ورثہ ءِ وزیر ءَ اے موہ ءِ سر ءَ ہدایت کت کہ ادارگ ءِ تہ ءَ صفائی ءِ برجائی ءِ واستہ ھاسیں رنگ ءَ واش روم ءُ وردن ءِ چیز آنی صفائی ءِ واستہ ھاسیں دلگوشی دیگ بہ بیت۔ آئی ءَ گوشت کہ ساپ ءُ سلہ نیم ایمان انت ایشی ءَ چہ نہ ایوک ءَ سیل ءُ سواد ءِ تہ ءَ گیشی بیت بلکینگ ءَ پاکستان ءِ جوانیں تاثر ھم پیداک بیت۔ وفاقی وزیر ءَ گوشت کہ بیست سال ءَ کم عمریں زھگ آنی تہ ءَ میوزکگرافی، آرٹس، دستکاری ءُ ٹرک آرٹ ءِ تہ ءَ مقابلہ برجم دارگ بہ بنت ءُ جوانیں کارکردگی پیش داروکیں زھگ آناں انعام دیگ بہ بیت۔ آئی ءَ جار جتگ کہ پاکستان نیشنل کونسل آف آرٹس ءِ تہ ءَ ھم گشندہی ءِ مقابلہ کنگ بنت۔ محمد اورنگزیب کھیچی ءَ گوشت کہ اے وڑیں گامگیج آنی وسیلگ ءَ ادارگ آناں دیمروئی رس ایت ءُ ھما شعبہ کہ مرگ ءَ انت چوشکہ روایتی دود ءُ ربیدگ (مرگ ءِ دود ءُ ربیدگ) ءَ را نوکیں زند رس ایت۔ دیوان ءَ 14اگست ءِ ھوالگ ءَ دود ءُ ربیدگ ءِ پروگرام آنی تیاری ءِ سر ءَ ھم سرجمی ءَ چار ءُ تپاسی کنگ بوت۔وفاقی وزیر ءَ گوشت کہ اے سال ءَ لوک میلہ ءَ درملکی کمپنی آناں دعوت دیگ بیت ءُ آ دود ءُ ربیدگی مبادل ءِ دیمروئی ءِ واستہ میلے ءَ وتی اسٹال ایر کن اَنت۔ اے ھاتر ءَ دگہ ملک آنی سفیر آناں باقاعدہ دعوت نامہ دیم دیگ بیت۔ اے درستیں گامگیج پاکستان ءِ دود ءُ ربیدگی ورثہ ءِ رکھینگ ءُ جھان ءِ پڑ ءَ ایشی ءَ را برجا کنگ ءِ تہ ءَ ھاسیں سنگ میل ثابت بنت۔
