اسلام آباد۔3جولائی (اے پی پی): عمانی سفیر ءَ وفاقی وزیر برائے سمندری کار محمد جنید انور چوہدری ءَ گوں گند ءُ نند کتگ، ایشی ءِ تہ ءَ دو نیمگی سمندری کمک ءِ ھوالگ ءَ سرجمیں گپ ءُ تران کنگ بوتگ۔ پنچ شمبے ءِ روچ ءَ برجم داشتگیں گند ءُ نند ءَ تران کنان ءَ وفاقی وزیر جنید انور چوہدری ءَ گوشت کہ پاکستان ءُ عمان ءِ نیام ءَ سرمایہ کاری ءِ موہ آنی سر ءَ تپاک کنگ بوتگ۔ گند ءُ نند ءَ میری ٹائم ٹریننگ، ریسرچ ءُ ٹیکنالوجی ءِ ھوالگ ءَ کمک ءِ سر ءَ ھیال ریچی کنگ بوت۔ وفاقی وزیر ءَ گوشت کہ پاکستان عمان ءِ گوما دراجیں مدت ءِ شریکداری لوٹ ایت ءُ عمان ءِ بندرگاہ ءِ مہارت ءَ چہ سیت زورگ لوٹ ایت۔ عمان ءِ سفیر ءَ گوادر بندرگاہ ءَ کاروباری چست ءُ ایر آنی تہ ءَ دلگوشی ءِ درشان کتگ ۔ عمانی سفیر ءَ تجارتی کمک ءِ پیشکش کتگ ءُ نوکیں بندرگاہ ءِ بندوبست ءُ کوسٹل ءِ دیمروئی ءِ تہ ءَ کمک پجاری کنگ بیت۔ آئی ءَ گوشت کہ دوئیں ملک آنی میری ٹائم ویژن ءِ ھمگرنچی ءِ ھوالگ ءَ گند ءُ نند ءَ دل یکیمی ءِ درشان کنگ بوت۔ گند ءُ نند ءِ ساھت ءَ وفاقی وزیر ءَ پاکستان میرین اکیڈمی ءَ عمانی نودربر آنی واستہ داخلہ ءِ جار جتگ۔ اے درگت ءَ عمانی سفیر ءَ تران کنان ءَ گوشت کہ پاکستان میرین اکیڈمی ءَ عمانی نودربر آنی واستہ داخلہ وش اتک انت۔ وفاقی وزیر جنید انور چوہدری ءَ گوشت کہ پاکستان میرین اکیڈمی ءَ را یونیورسٹی ءِ درجہ دیگ ءِ واستہ گامگیج کنگ بوھگ ءَ انت۔
