اسلام آباد۔2جولائی (اے پی پی): پاکستان پیپلز پارٹی ءِ چیئرمین بلاول بھٹو زرداری ءَ گوشت کہ پاکستان ءِ ناشرکاری ءِ ھلاپ ءَ گامگیج آناں جھان ءِ تک ءَ سرجمی ءَ منگ بہ بیت ءُ شریکداری ءِ وسیلگ ءَ کمک کنگ بہ بیت تانکہ ناشرکاری ءِ آفت چہ بُن ءَ ھلاس کنگ بہ بیت ءُ ناشرکاری ءِ ھلاپ ءَ میاں اوستمانی کمک ءَ را گیش کنگ بہ بیت۔ آئی ءَ اے گپ اسلام آباد سیاسی پٹ ءُ پولی ادارگ ءِ نیمگ ءَ برجم داشتگیں ھاسیں میاں اوستمانی کانفرنس ءِ تہ ءَ گشتانک دیان ءَ گوشت کہ پاکستان ناشرکاری ءِ ھلاپ ءَ مھکمیں دیوال اِنت۔ کانفرنس ءِ مول ءُ مراد ناشرکاری ءِ ھلاپ ءَ پاکستان ءِ ازمت، قربانی ءُ حکمت عملی ءَ را پدر کنگ بوتگ۔ چار شمبے ءِ روچ ءَ آئی پی آر آئی ءِ نیمگ ءَ جاڑی بوتگیں پریس ریلیز ءِ رد ءَ پاکستان پیپلز پارٹی ءِ چیئرمین بلاول بھٹو زرداری ءَ کانفرنس ءِ تہ ءَ بنگیجی گشتانک داتگ۔ آئی ءَ گوشت کہ ما ناشرکاری ءِ ھلاپ ءَ 92 ھزار ءَ چہ گیش مردم آنی جان ندر کتگ، 150 ارب ڈالر ءَ چہ گیش اقتصادی تاوان رستگ بلے مئے قربانی آناں منگ ءِ بدل ءَ دگنیا جست کنت کہ آیا پاکستان ھما کساس ءَ کنگ ءَ اِنت؟ آئی ءَ گوشت کہ پاکستان ءِ ناشرکاری ءِ ھلاپ ءَ کوشست آناں جھان ءِ کمک ءُ شریکداری ءِ وسیلگ ءَ کمک کنگ بہ بیت تانکہ ناشرکاری ءِ آفت آئی ءِ بُن ھشت ءَ چہ ھلاس کنگ بہ بیت، ءُ ملک ءَ انتہا پسندی ءِ ھلاپ ءَ جھان ءِ کمک ءَ را گیش کنگ بہ بیت۔ آئی ءَ گوشت کہ پاکستان ءَ القاعدہ، داعش، ٹی ٹی پی ءُ اے دگہ نیٹ ورک آناں شکست داتگ، پاکستان ءِ تجربہ ءَ را دگنیا ءِ واستہ ماڈل ءِ رنگ ءَ زیرگ بوت کنت۔ نیشنل ایکشن پلان، ایف اے ٹی ایف ءِ کانود ءُ بارڈر سیکورٹی آپریشن آنی سبب ءَ اندری سیکورٹی ءِ تہ ءَ گہتری اتکگ۔ بلاول بھٹو ءَ بھارت ءِ سر ءَ زور پر دات کہ آ گپ ءُ تران ءِ ٹیبل ءِ سر ءَ بیا ایت ، کشمیر ءِ جیڈھ ءَ گیش ءُ گیوار بہ کنت ءُ آپ ءِ جیڈھ ءِ سر ءَ کمک بہ کنت ۔ آئی ءَ چہ میاں اوستمانی براتی ءَ لوٹ کتگ کہ پاکستانی اُرد، پولیس ءُ الس ءِ قربانی آں چہ ما نہ ایوک ءَ ناشرکاری ءِ ھلاپ ءَ جنگ کتگ بلکینگ ءَ ایشی ءِ ھلاپ ءَ یک لائقیں ماڈل ءِ جوڑ کتگ۔ آئی پی آر آئی ءِ صدر لیفٹیننٹ جنرل (ریٹائرڈ) مجید احسان ءَ کانفرنس ءَ گوں گشتانک دیان ءَ گوشت کہ پاکستان ءَ ناشرکاری ءِ ھلاپ ءَ جنگ بورڈ روم آنی تہ ءَ نہ کتگ، بلے 90 ھزار ءَ چہ گیش قربانی ءَ پد ھم جھان ءِ امن ءِ واستہ وتی جہد ءَ را یلہ نہ داتگ۔ آئی ءَ گوشت کہ پاکستان ءِ ناشرکاری ءِ ھلاپ ءَ حکمت عملی ایوک ءَ جنگی گامگیج آنی تہ ءَ بندوک نہ اِنت بلکینگ ءَ ایشی ءِ تہ ءَ اقتصادی، چاگردی ءُ سفارتی تک ءَ یکجاھیں گامگیج ھم ھوار اَنت۔ آئی ءَ گوشت کہ ما اے جنگ ایوک ءَ توپک ءِ گوما نہ بلکیں وتی ھون، قربانی ءُ راجی جزم ءِ گوما جنگ کتگ، نوں وھد اتکگ کہ دگنیا پاکستان ءِ قربانی آناں من ایت ءُ پاکستان ءَ را ناشرکاری ءِ ھلاپ ءَ فرنٹ لائن اسٹیٹ جوڑ بہ کنت۔ راجی سلامتی ءِ پیسریگیں مشیر لیفٹیننٹ جنرل (ریٹائرڈ) نصیر خان جانجوا ءَ کانفرنس ءَ گوں تران کنان ءَ گوشت کہ ناشرکاری پاکستان ءِ واستہ ایوک ءَ سیکورٹی چیلنج نہ اِنت بلکیں راجی چکاس اِنت۔ آئی ءَ یات دات کہ پاکستان ءَ 90 ہزار ءَ چہ گیش مردمانی جان قربان کتگ ءُ 150 ارب ڈالر ءَ چہ گیش معاشی تاوان رستگ، اے ایوک ءَ ریاستی جنگ نہ انت بلکیں راجی حکمت عملی انت۔ ممبر پی وی ای نیکٹا ڈاکٹر خالد چوہان ءَ گوشت کہ راجی ایکشن پلان ءِ جوانیں رنگ ءَ عملدرآمد ءِ گوما راجی نصاب ءِ تہ ءَ اصلاحات ءِ ارزشت ءِ سر ءَ زور پر دات۔ ڈاکٹر انیل سلمان ءَ کانفرنس ءِ اقتصادی تک ءَ را پدر کنان ءَ گوشت کہ پاکستان ءَ ایف اے ٹی ایف ءِ لوٹ آنی سر ءَ عمل کنگ ءَ منی لانڈرنگ ءُ ناشرکاری ءِ مالی کمک ءِ ھلاپ ءَ جوانیں گامگیج چست کتگ۔ پاکستان ءِ مالیاتی اصلاحات ءَ میاں اوستمانی معیار ءِ سر ءَ عمل کتگ بلے انگت ءَ لھتیں جیڈھ آنی سر ءَ چہ دیم ءَ رؤگ ءِ ضلورت اِنت کہ آ ایشی ءَ را دائمی جوڑ کن اَنت۔ پیسریگیں آئی جی ڈاکٹر سید کلیم امام ءَ گوشت کہ ناشرکاری ایوک ءَ ڈن ءَ چہ درآمدیں جیڑھے نہ انت بلکیں ایشی ءِ تہ ءَ تہی سبب ھم ھوار انت۔ آئی ءَ پولیس ءَ را اولی رد ءِ ادارہ جوڑ کنگ، سرحدی دمگ آنی تہ ءَ دمگی بھرتی ءُ ھاسیں اطلاعات ءِ مراگش جوڑ کنگ ءِ سوج داتگ۔ جست ءُ پرس ءِ دیوان ءَ ھواریں مردماں راجی ایکشن پلان ءِ نفاذ، آسراتی ءِ احتساب ءُ کانود ءِ نفاذ ءِ ادارگ آنی تہ ءَ اصلاحات ءِ ھوالگ ءَ جُست ءُ پُرس کتگ۔ گشتانک دیوکاں وتی پسو آنی تہ ءَ اے موقف زرتگ کہ ناشرکاری ءِ ھلاپ ءَ جنگ ایوک ءَ کانود ءِ جیڑھ نہ اِنت بلکیں اجتماعی راجی شعور ءُ راجمانی ارادہ ءِ لوٹ اِنت۔
