راجی ورثہ ءُ دود ءُ ربیدگ ءِ وفاقی وزیر محمد اورنگزیب کھچی ءَ ایتھوپیا ءِ سفیر ءَ گوں گند ءُ نند کتگ، دود ءُ ربیدگ ءِ کمک ءَ را گیش کنگ ءِ سر ءَ تپاک

اسلام آباد۔1جولائی (اے پی پی): راجی ورثہ ءُ دود ءُ ربیدگ ءِ وفاقی وزیر محمد اورنگزیب کھچی ءَ پاکستان ءَ وفاقی جمہوریہ ایتھوپیا ءِ ھاسیں نمائندہ ءُ سفیر ڈاکٹر جمال باقر ءَ گوں گند ءُ نند کت۔ سئے شمبے ءَ ادا گند ءُ نند ءَ سیکرٹری راجی ورثہ ءُ دود ءُ ربیدگ ھم ساڑی ات۔ وفاقی وزیر ءَ شرپ مندیں مہمان ءَ را وش اتک کت ءُ گلدستہ دات۔ گند ءُ نند ءِ تہ دوئیں ملک آنی نیام ءَ دود ءُ ربیدگی ءُ مردمی سیادی ءَ را گیش مھکم کنگ ءِ سر ءَ سرجمیں گپ ءُ تران کنگ بوت۔ پاکستان ءِ بابت ءَ وتی جزبگ آنی درشان کنان ءَ ایتھوپیا ءِ سفیر ءَ گوشت کہ من ءَ پاکستان سک باز دوست بیت، من لاہور، کراچی ءُ اسلام آباد ءَ شتگ آں ایشی ءِ تہ ءَ اد ءِ مردم سک باز مہروان ءُ مہمان نواز گندگ بوتگ اَنت۔ آئی ءَ وتی وانگ ءُ زانگ، پیشہ وارانہ کیریئر ءُ ایتھوپیا ءِ راجدپتری ارزشت ءِ سر ءَ ھم چمشانک دات۔ آئی ءَ گوشت کہ پاکستانی راج بہادر، دلیر ءُ ذھین اِنت ءُ آئی ءِ دود ءُ ربیدگ بے درور ءُ زیبا اِنت۔ وفاقی وزیر محمد اورنگزیب کھچی ءَ سفیر ءَ را پاکستان ءِ جغرافیہ ءُ دود ءُ ربیدگ ءِ بابت ءَ سرپد کت۔ آئی ءَ درشان کت کہ وزارت دود ءُ ربیدگ ءُ راجی ورثہ ءِ نیمگ ءَ چہ جتا جتائیں دود ءُ ربیدگ ءِ ادارگ آنی وسیلگ ءَ ملک ءِ دود ءُ ربیدگ ءَ را چوں دیمروئی دیگ بوھگ ءَ اِنت۔ وفاقی وزیر ءَ گوشت کہ پاکستان ءُ ایتھوپیا یکجائی ثقافتی منصوبگ آنی سر ءَ کار کت کن اَنت ءُ دوئیں ملک اے پڑ ءَ وت مہ وتی کمک ءَ را گیش کنگ ءِ راہ آنی سر ءَ چار ءُ تپاسی ءَ کنگ ءَ اَنت۔ گند ءُ نند ءَ وت مہ وتی مردم آنی رابطہ ءُ نزیکیں کمک ءَ را گیش دیمروئی دیگ ءِ سر ءَ ھم تپاک کنگ بوت۔ ایتھوپیا ءِ سفیر ءَ سوج دات کہ دوئیں ملک آنی نیام ءَ دود ءُ ربیدگی یادداشت آنی سر ءَ دستخط کنگ ءَ وت مہ وتی کمک ءَ را گیش گیش کنگ بوت کنت۔ وفاقی وزیر ءَ گوشت کہ ما توامیں المی ئیں رسمی آناں وتیگ کنان ءَ دود ءُ ربیدگ ءِ شوبگ ءَ ایتھوپیا ءِ گوما کمک ءَ را گیش مھکم کن ایں ۔ آئی ءَ گیش گوشت کہ دود ءُ ربیدگ ءُ ورثہ ءِ پڑ ءَ کمک ءِ دیمروئی ءِ واستہ ایتھوپیا ءِ سفیر ءِ نیمگ ءَ داتگیں پنت ءُ شون سک باز کارآمد ءُ عملی انت۔ گند ءُ نند ءِ ساھت ءَ فریق آناں اے گپ ءِ سر ءَ ھم زور پر دات کہ پاکستان ءُ ایتھوپیا ءِ نیام ءَ دود ءُ ربیدگ ءِ کار آنی تہ ءَ کمک ءَ را گیش وسعت دیگ بہ بیت پرچا کہ دوئیں ملک آنی دود ءُ ربیدگ ءِ ورثہ بے دروریں رنگ ءُ دروشم ءُ زرباری اِنت۔ ایتھوپیا ءِ سفیر ءَ تجارت ءِ دیمروئی ءِ واستہ دود ءُ ربیدگ ءَ را پُل ءِ رنگ ءَ کارمرد کنگ ءِ ھم سوج داتگ کہ ایشی ءَ را وفاقی وزیر ءَ ساڑاتگ ءُ گوشت کہ دود ءُ ربیدگ ءِ وسیلگ ءَ دوئیں راج آنی نیام ءَ سیادی گیش گہتر ءُ بامرد بوت کن اَنت۔ پاکستان ءَ وفاقی جمہوریہ ایتھوپیا ءِ ھاسیں نمائندہ ءُ سفیر ڈاکٹر جمال بقر ءَ دود ءُ ربیدگ ءُ ورثہ ءِ وفاقی وزیر ءَ را ھال دات کہ وفاقی جمہوری جمہوریہ ایتھوپیا ءِ مزن وزیر ڈاکٹر ابی احمد ءِ چیر دستی ءَ کتاب ”میڈیمر نسل“ ءِ نبشتہ کار وفاقی جمہوریہ ایتھوپیا ءِ مزن وزیر ڈاکٹر ابی احمد ءِ چیر دستی ءَ باقاعدہ پاکستان ءِ لیبرا نیشنل کو ( پاکستان ءِ سرکار ءُ راجی زبان ءِ دیمروئی ءِ کارگس ءِ ”افریقی کونے ءِ جہد“ ھم اے کتاب ءَ اردو ءَ رجانک کنت۔