لاہور ۔1جولائی (اے پی پی):ریلوے ءِ وفاقی وزیر حنیف عباسی ءَ گوشت کہ مزن وزیر محمد شہباز شریف ءِ ہدایت ءِ رد ءَ ریلوے سرجمی ءَ ڈیجیٹل کنگ بوھگ ءَ انت ایشی ءِ تہ ءَ مسافر آناں گیش ءَ چہ گیش آسراتی پجاری کنگ بیت۔ اے درگت ءَ ریلوے اسٹیشن آنی سر ءَ مفت وائی فائی ءِ آسراتی پجارینگ ءِ واستہ گامگیج کنگ بوھگ ءَ انت، ایشی ءِ گوما سرجمیں ملک ءَ ٹریکنگ سسٹم ءَ را ھم گہتر کنگ بوھگ ءَ انت تانکہ مسافر پرواز آنی وڑ ءَ ٹرین آنی ٹریکنگ ءَ بہ کن انت۔ آئی ءَ اے ھیالانی درشانی ریلوے ءِ ہیڈ کوارٹر ءَ پاکستان ریلوے ءُ پنجاب انفارمیشن ٹیکنالوجی بورڈ ءِ نیام ءَ ریلوے ءَ را ڈیجیٹل کنگ ءِ واستہ مفاہمت نامہ ءِ سر ءَ دستخط کنگ ءِ مراگش ءِ موہ ءَ کت۔ اے معاہدہ ءِ سرا پاکستان ریلوے ءِ نیمگ ءَ ڈائریکٹر آئی ٹی سید علی رضا ءَ دستخط کتگ ءُ پنجاب انفارمیشن ٹیکنالوجی بورڈ ءِ نیمگ ءَ ڈائریکٹر ڈویلپمنٹ اینڈ پروکیورمنٹ عطا الرحمان ءَ کتگ۔ وفاقی وزیر حنیف عباسی ءَ گوشت کہ پاکستان ریلوے ءِ گہتری ءِ واستہ جوانیں گامگیج کنگ بوھگ ءَ انت۔ پنجاب انفارمیشن ٹیکنالوجی بورڈ ءِ کمک ءَ 40 ریلوے اسٹیشن آنی سر ءَ وائی فائی ایر کنگ بوھگ ءَ انت کہ ایشی ءَ را الس ءِ واستہ سوگات لیکگ بوت کنت۔ ایشی ءَ ابید توامیں اسٹیشن آنی سر ءَ اے ٹی ایم مشین ایر کنگ بنت ءُ سئے مزنیں ریلوے اسٹیشن ءَ را میاں اوستمانی معیار ءِ رد ءَ نوک کنگ بیت۔ آئی ءَ گوشت کہ من پنجاب انفارمیشن ٹیکنالوجی بورڈ ءِ کارکردگی ءَ چہ سک باز متاثر آں۔ سر وزیر پنجاب ءِ سروکی ءَ پنجاب انفارمیشن ٹیکنالوجی بورڈ دیمروئی ءِ کشک ءَ روگ ءَ انت۔ آئی ءَ پنجاب ءِ ھواری ءَ پاکستان ریلوے ءِ واستہ 350ارب کلدار ءِ میگا پروجیکٹ داتگ اَنت۔
