اسلام آباد۔27جون (اے پی پی): پاکستان ءَ امریکی قائم مقام سفیر نیٹلی بیکر ءَ وفاقی تہی کارانی وزیر محسن نقوی ءَ گوں ھاسیں گند ءُ نند کتگ ءُ وت مہ وتی مفاد ءِ جیڈھ آنی سر ءَ گپ ءُ تران کتگ، پاک امریکہ ءِ سیادی ءُ ناشرکاری ءِ ھلاپ ءَ ءُ منشیات ءِ ھلاپ ءَ کمک ءَ ھوار جتا جتائیں پڑ آنی تہ ءَ کمک ءَ را گیش کنگ ءِ جیڈھ آنی سر ءَ گپ ءُ تران کتگ۔ جمعہ ءِ روچ ءَ وزارت داخلہ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ دمگی جاور ھال ءُ فیلڈ مارشل عاصم منیر ءِ امریکی صدر ڈونلڈ ٹرمپ ءِ گوما گند ءُ نند ءِ سر ءَ سرجمیں رنگ ءَ گپ ءُ تران کنگ بوتگ۔ وزیر داخلہ محسن نقوی ءَ ایران ءُ اسرائیل ءِ نیام ءَ جنگ بندی ءِ آرگ ءِ واستہ امریکی صدر ڈونلڈ ٹرمپ ءِ غیر معمولی قیادت ءُ مخلصانہ کوشست آناں ساڑات۔ تہی کارانی وزیر ءَ گوشت کہ پاکستان ءُ بھارت ءَ چہ پد ایران ءُ اسرائیل ءِ جنگ بندی ءَ امریکی صدر ڈونلڈ ٹرمپ ءِ جوانیں کرد مدام یات کنگ بیت۔ محسن نقوی ءَ گشتگ کہ امیت انت امریکی صدر ڈونلڈ ٹرمپ ہم غزہ ءَ جنگ بندی ءِ کار ءَ کنت۔ وزیر داخلہ ءَ گوشت کہ امن ءِ برجائی ءِ واستہ امریکی صدر ڈونلڈ ٹرمپ ءِ نیمگ ءَ چست کتگیں مزنیں گامگیج آناں ساڑات آں ۔ آئی ءَ گوشت کہ پاکستان ءَ مدام کشمیر ءُ اے دگہ جیڑھ آناں گپ ءُ تران ءِ وسیلگ ءَ گیش ءُ گیوار کنگ لوٹ اتگ۔ پاکستان امن ءِ واستہ چست بوتگیں ہر گامگیج ءَ را وش اتک کنت۔ قائم مقام امریکی سفیر نیٹلی بیکر ءَ پڑ ءَ امن ءِ واستہ پاکستان ءِ سفارتی کوشست آناں ساڑات ءُ گوشت کہ پاکستان مئے ھاسیں سنگت اِنت۔ قائم مقام امریکی سفیر ءَ گوشت کہ آ پاکستان ءِ گوما سیادی ءَ را ھاسیں ارزشت ءَ دئینت۔
