اسلام آباد۔27جون (اے پی پی): مزن وزیر محمد شہباز شریف ءَ گوشت کہ پاکستان ءِ اقتصادی دیمروئی ءِ واستہ مارا درستاں شپ ءُ روچ یکجا کار کنگی اِنت، ما درستیں اتحادی گل آنی منت وار ایں، آھانی شور ءُ سلاھ ءَ یک انچیں بجٹ جوڑ کنگ بوتگ کہ ایشی ءِ تہ ءَ الس ءِ واھشت آنی درشانی کنگ بوتگ، اتحادی گل آناں ایشانی واستہ ھاسیں کرد پیلو کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ بجٹ 2025ءِ منظوری ءَ پد سینیٹ ءُ راجی اسمبلی ءِ باسک آں گوں گند ءُ نند کتگ۔اے موہ ءِ سر ءَ مزن وزیر ءَ گوشت کہ اقتصادی ٹیم ءَ یک راج ءِ تیاری ءِ واستہ شپ ءُ روچ بجٹ دوستی ءَ کار کتگ۔ قومی اسمبلی ءِ باسک آں گوں تران کنان ءَ مزن وزیر ءَ گوشت کہ توامیں اتحادی گل آنی شگر ءُ منت وار آں، ایشانی شور ءُ سلاھ ءَ یک انچیں بجٹ جوڑ کنگ بوتگ کہ ایشی ءِ تہ ءَ الس ءِ واھشت آناں پدر کنگ بوتگ، بجٹ ءِ منظوری ءَ اتحادی گل آں ھاسیں کرد پیلو کتگ، ایشی ءِ واستہ من ایشانی شگر ءُ منت وار آں۔ مزن وزیر ءَ گوشت کہ نوں پاکستان ءِ اقتصادی دیمروئی ءِ واستہ مارا درستاں یکجائی ءَ شپ ءُ روچ کار کنگی انت۔ من ءَ اے گپ ءِ سر ءَ دلجمی ءَ گوں باور اِنت کہ اے آئیڈیل یکوئی ءَ چہ پاکستان ءِ اقتصادی دیمروئی ءَ را دل یکیمی کنگ بیت۔ انوگیں پاکستان ءِ سر ءَ ھندوستان ءِ بے جاہیں زوراکی ءَ اللہ تعالیٰ ءَ مارا شانداریں سوبمندی یے داتگ۔ مزن وزیر ئَ گوشت کہ پاکستانی سلاھبند اُرد، سرجمیں سیاسی سروکی، الس، سول سوسائٹی ئُُ میڈیا ئَ یکجائی ئَ دژمن ئِ بد نیتی آناں چکچل کت۔ پاکستان ءِ سوب مندی ءَ چہ دنیا ءِ راجانی تہا پاکستان ءِ نام بُرز بوت۔ مزن وزیر ءَ گوشت کہ چیئرمین پاکستان پیپلز پارٹی بلاول بھٹو زرداری ءِ سروکی ءَ سفارتی ڈل ءَ پاکستان ءِ موقف پدر کتگ ءُ پاکستان ءِ ھلاپ ءَ بھارت ءِ نا شریں واھشت آناں دگنیا ءِ دیم ءَ پدر کتگ۔ نہ ایوک ءَ سفارتی ڈل ءَ را میاں اوستمانی پجار رستگ بلکیں درملک ءَ نندوکیں پاکستانی آں ڈل ءَ را مزنیں وش اتک کتگ ءُ پاکستان ءِ سفارتی ءُ جنگی سوبمندی ءِ واستہ پاکستان ءِ حکومت ءُ سلاہ بندیں اُرد ءَ را شگر ءُ منت گپتگ۔ مزن وزیر ءَ گوشت کہ گوستگیں وھد ءَ ایران ءِ سر ءَ اسرائیل ءِ زوراکی ءِ وھد ءَ پاکستان ءَ ھمک پڑ ءَ ایران ءِ حکومت ءُ براتیں الس ءَ گوں یکوئی ءِ درشان کتگ ءُ جنگ ءِ وھد ءَ ایران ءِ سروکی ھاسیں رنگ ءَ صدر ڈاکٹر مسعود پزیشکیان ءَ گوں سرجمی ءَ رابطہ ءَ بوتگ۔ مزن وزیر ءَ گوشت کہ اسرائیل ءُ ایران جیڈھ ءِ گیواری ءَ چہ خطہ ءَ امن ءُ وشھالی ءِ دروازگ پچ بنت۔ چیئرمین سینیٹ، وفاقی کابینہ، سینیٹ ءُ راجی اسمبلی ءِ مزنیں کساسے ءَ باسکاں اے دیوان ءَ بہر زرتگ۔
