اسلام آباد۔26جون (اے پی پی):بنجاھی تہی کارانی وزیر محسن نقوی ءَ گوشت کہ محرم ءِ وھد ءَ کس ءَ را زوراکی ءُ بدمعاشی ءِ دیم ءَ آرگ ءِ اجازت نہ دیگ بیت، ضابطہ اخلاق ءِ سر ءَ سک باز عمل کنگ بیت، ءُ نوکیں ٹیکنالوجی ءِ وسیلگ ءَ جلوس ءُ مچی آنی نگرانی ءَ را گیش کنگ بیت۔ اے ھیالانی درشانی بنجاھی وزیر تہی کار محسن نقوی ءَ محرم سیکورٹی پلان ءِ ھوالگ ءَ سرجمیں ملک ءَ برجم داشتگیں ھاسیں دیوان ءِ سروکی ءَ کنان ءَ کت۔ گند ءُ نند ءَ محرم ءِ واستہ آزاد کشمیر، گلگت بلتستان ءُ اسلام آباد ءَ ھوار توامیں صوبگ آنی سیکورٹی منصوبگ ءِ سر ءَ چار ءُ تپاسی کنگ بوت۔ پنچ شمبے ءِ روچ ءَ وزارت تہی کار ءِ نیمگ ءَ جاڑی بوتگیں بیان ءِ رد ءَ سوشل میڈیا ءِ سر ءَ مذھبی نفرت ءِ شنگ کنوکیں عناصر آنی ھلاپ ءَ سکیں کانودی کارروائی کنگ بیت ءُ اے وڑیں عناصر کانود ءِ چیر دستی ءَ آرگ بنت۔ ایشی ءَ ابید الیکٹرانک ءُ سوشل میڈیا ءِ سر ءَ نفرت انگیزیں مواد ءِ دیم ءَ دارگ ءِ ھاترا پیمرا ءَ را ھاسیں سفارش دیم دیگ بنت ءُ اے ھم پیسلہ کنگ بیت کہ محرم ءِ وھد ءَ امن ءُ ایمنی ءِ ھاترا درستیں المی انتظامی گامگیج زورگ بہ بنت۔ گند ءُ نند ءِ تہ پیسلہ کنگ بوت کہ سیکورٹی ءِ جیڈھ آنی رد ءَ انٹرنیٹ یا موبائل فون سروس ءِ بند کنگ ءِ پیسلہ ھمگرنچیں صوبگ آنی گوما شور ءُ سلاھ ءَ کنگ بیت۔ اے موہ ءِ سر ءَ تہی کارانی وزیر محسن نقوی ءَ پنت ءُ شون کت کہ انٹرنیٹ یا موبائل فون سروس ءِ ھوالگ ءَ جغرافیائی راستی ءُ سیکورٹی ءِ جاور ھال ءَ را ھیال ءَ دارگ ءَ پیسلہ کنگ بہ بیت، درستیں المی ئیں گامگیج ءُ پیسلہ وت مہ وتی شور ءُ سلاھ ءَ کنگ بنت۔ محسن نقوی ءَ گیش گوشت کہ فیڈریشن صوبگ، آزاد کشمیر، گلگت بلتستان ءُ اسلام آباد ءَ امن ءِ برجائی ءِ واستہ ھمک رنگ ءِ کمک ءَ کنت۔ آئی ءَ گیش گوشت کہ کس ءَ را زوراکی ءُ بدمعاشی ءِ دیم ءَ آرگ ءِ اجازت نہ دیگ بیت، محرم الحرام ءِ وھد ءَ ضابطہ اخلاق ءِ سک باز عمل کنگ بیت، جلوس ءُ مچی آنی نگرانی نوکیں ٹیکنالوجی ءِ وسیلگ ءَ کنگ بیت۔ گند ءُ نند ءَ پولیس ءِ انسپکٹر جنرل ءُ پنجاب، خیبر پختونخوا، سندھ، بلوچستان، آزات کشمیر، گلگت بلتستان ءُ اسلام آباد ءِ تہی کار سیکرٹریٹ آنی نیمگ ءَ محرم الحرام سیکورٹی منصوبگ ءِ بابت ءَ سرپدی دات۔ گند ءُ نند ءَ وزیر ءِ تہی کار طلال چوہدری، بنجاھی سیکرٹری تہی کار، قائم مقام چیئرمین سی ڈی اے، کمانڈنٹ فرنٹیئر کانسٹیبلری، ڈی سی اسلام آباد، ڈی آئی جی اسلام آباد پولیس، وزارت تہی کار ءُ کانود ءِ نفاذ ءِ ادارگ آنی مزنیں کارندہ آنی بھر زوری بوتگ، وھدیکہ درستیں صوبگ آنی آئی جی پی، کشگیت ہوم، ڈی جی رینجرز پنجاب، ڈی جی رینجرز سندھ ءُ کانود نافذ کنوکیں ادارگ آنی مزن مزنیں کارندہ آں ویڈیو لنک ءِ وسیلگ ءَ گند ءُ نند ءَ بھر زرتگ۔
