اسلام آباد۔26جون (اے پی پی): پاکستان پیپلز پارٹی ءِ چیئرمین بلاول بھٹو زرداری ءَ مزن وزیر، وزیر ءِ ھزانگ ءُ سرکاری ٹیم ءِ شگر ءُ منت گپت کہ آہاں بجٹ ءِ تہ ءَ پیپلز پارٹی ءِ سوج ءُ سفارش من اِتگ اَنت ءُ گوشت کہ پیپلز پارٹی بجٹ ءِ سرجمی ءَ کمک کنت ءُ بجٹ ءِ منظوری ءَ سرجمی ءَ کمک کنت ۔ پنچ شمبے ءِ روچ ءَ راجی اسمبلی ءِ اسپیکر علی محمد خان ءِ نیمگ ءَ چست کتگیں نکات آنی پسو ءَ بلاول بھٹو زرداری ءَ گوشت کہ حکومت ءَ پیپلز پارٹی ءِ بجٹ ءِ ھوالگ ءَ سوج ءُ پنت من اِتگ اَنت پمیشکا ما بجٹ ءِ سرجمی ءَ کمک کن آں۔ استیں سرکار ءَ انکم سپورٹ پروگرام ءِ بجٹ ءَ 20 درسد گیش کتگ، ایشی ءِ برعکس تحریک انصاف ءِ سرکار ءَ اے پروگرام نزور کنگ ءِ کوشست کتگ۔ بلاول بھٹو زرداری ءَ گوشت کہ مزن وزیر محمد شہباز شریف ءَ انکم سپورٹ پروگرام ءِ بجٹ ءِ تہ ءَ گیشی ءِ ھوالگ ءَ جوانیں رویہ ءِ درشان کتگ۔ آئی ءَ گوشت کہ حکومت ءَ تنخواہ دار طبقہ ءِ سر ءَ ٹیکس ءِ بار ءِ کم کنگ ءِ ھوالگ ءَ پیپلز پارٹی ءِ سوج ھم من اِتگ اَنت۔ نوں 1.2 ملین کلدار ءَ تاں کمائی کنوکیں مردمانی سر ءَ ٹیکس ءِ شرح ءَ باز کم کنگ بوتگ۔ ایشی ءَ ابید مئے لوٹ ءِ سر ءَ سولر پینل ءِ سر ءَ ٹیکس ءِ شرح 50درسد کم کنگ بوتگ۔ بلاول بھٹو زرداری ءَ گوشت کہ حکومت ءَ ایف بی آر ءَ را دزگیر کنگ ءِ وارنٹ دیگ ءِ ھوالگ ءَ پیپلز پارٹی ءِ پیشکش ءِ ھم حمایت کتگ۔ نوں دزگیر کنگ ایوک ءَ سیلز ٹیکس ءِ دھاندلی ءِ کیس ءَ بیت ءُ اے جرم وثیقہ ءِ سرا ھوار بیت۔ ما بجٹ ءِ سرا اپوزیشن ءِ نیمگ ءَ چست بوتگیں بُوکگ آنی سرا جوانیں پسو داتگ ءُ وتی کرد پیلو کتگ ۔ ما حکومت، مزن وزیر، ءُ وزیر خزانہ ءِ ہم منت واریں کہ آہاں پیپلز پارٹی ءِ لوٹ من اِتگ اَنت۔
