راولپنڈی۔ 25 جون (اے پی پی) میجر سید معیز عباس شاہ شہید انا نماز ءِ جنازہ چکلالہ گیریژن راولپنڈی ٹی خواننگا۔ او سویلی وزیرستان نا علاقہ سراروغہ ٹی بھارتی مخ تف فتنۃ الخوارج آتا برخلاف آپریشن اٹی شہیدی نا جام ءِ نوش کریسس۔ چیف آف آرمی اسٹاف فیلڈ مارشل سید عاصم منیر، بنجائی وزیرداخلہ، بڑزکو عسکری و سول آفیسر و ورناک نماز جنازہ ٹی بشخ ہلکر۔ 37 سال انا شہید میجر معیز عباس نا تعلق ضلع چکوال آن ءِ۔ چارشنبے نادے آ آئی ایس پی آر آن جاری بیان نار داٹ آرمی چیف فیلڈ مارشل سید عاصم منیر پارے کہ میجر سید معیز عباس شاہ جیرت وبہادری اٹ دشمن نا مقابلہ ءِ کرسا تینا جون ءِ ندر کرے و بہادری ، قربانی و حب الوطنی نا بڑزکو مثال اس قائم کرے۔ مچ آ قوم اونا قربانی تیا گمر کیک و ملکی دفاع کن اونا قربانی تے سلام پیش کیک۔ نن تینا شہید آتا مقروض اُن۔ ننا شہید آتا مقدس دتر قومی سوگوی نا تمبہ ءِ۔ شہید انا میت ءِ اونا باوہ پیرہ ئی آ علاقہ غا گدریفنگانے ہراڑے اودے پورو فوجی اعزاز اتون جہہ جاگہ کننگک۔
