اسلام آباد۔ 25 جون (اے پی پی) چیئرمین سینیٹ سید یوسف رضاگیلانی داہیت آ زور شاغا کہ پاکستان و سعودی عرب نا تعلقداری اسیجائی عقیدہ، تاریخ، مذہبی و دودوربیدہ ئی مماثلت آ تالان ءُ۔ چیئرمین سینیٹ داخیال آتا درشانی ءِ سعودی عرب پاکستان فرینڈ شپ گروپ ناسروک میجر جنرل (ر) ڈاکٹر عبدالرحمان بن سنہت الہربی نا کماشی ٹی ڈل اتون پارلیمنٹ ہاؤس اٹی گپ وتران کرساکرے۔ اوڑدہی ٹی بطور اسپیکر و بطور وزیراعظم سعودی سرکڑدہ غاتون مروک آ بڑزکو کہول اوڑدہی تا ذکر ءِ ہم کرے و اوفتے تاریخی گوندا۔ اوپارے کہ نن ولی عہد نا دورہ ءِ پاکستان نا بے تابی اٹ چاری اُن۔ چیئرمین سینیٹ تدوک آ سال سعودی عرب نا سرسہب دورہ و اوکان پد چیئرمین شوریٰ کونسل نا پاکستان نا دورہ ناذکر ءِ کرسا پارے کہ دا ہڑتوم آ دورہ غاک پارلیمانی سفارتکاری نا اہمیت ءِ تالان کرینو۔ سید یوسف رضاگیلانی سینیٹ آف پاکستان و شوریٰ کونسل نا نیام اٹ باقاعدہ ہیت وگپ ءِ ادارہ جاتی دروشم اس تننگ نا گرج آ زورشاغا۔ اوسعودی عرب اٹی رہینگوک 25 لکھ آن زیات پاکستانی تا کڑد انا ستاءِ کرے ہرانئے بیرہ سعودی زرگزران نا شونداری ٹی کمکار ءُ بلکن زر راہی تس انا کمک اٹ پاکستانی زرگزران نا ہم تمبہ ءُ۔ چیئرمین سینیٹ ایسری ہیت آتیٹی پاکستان نا سعودی عرب تون ایلمی تعلقداری ٹی وابستگی نا درشانی ءِ کرے و اومیت ظاہرکرے کہ ہڑتوم آملک آتا نیام اٹ سنگتی نامون آ دننگ کن جوڑ گروپ نا کوشست آک اسہ پوسکن ءُ دور اسے نا بنانا سوب مریرہ، ہراپائیدار ، شون ہلوک و آخبت نا خواست آتون ہم گرنچ مریر۔ داکان مست سعودی ڈل انا سروک پارلیمنٹ ہاؤس آ سرمس ہراڑے چیئرمین سینیٹ اوفتے جم وجوش اٹ بخیرکرے۔ سعودی ڈل انا سروک چیئرمین سینیٹ نا منت واری ءِ ہرفسا پارے کہ پاکستان ڈیہہ انا اسہ اہم ءُ ملک اسے ، و ہڑتوم آ کنڈآتا تعلقداری و کثیر الجہتی کمکاری ءِ بھاز اہمیت ایتک۔ چیئرمین سینیٹ ڈل انا شرف اٹی دے انا اِرغ اس ہم تس ہراٹی سینیٹ نا باسک آک، قومی اسمبلی و پاکستانی سعودی عرب فرینڈ شپ گروپ ناسروک عمر گورگیج و باسک آک بشخ ہلکر۔ دے انا اِرغ آن تران اٹی چیئرمین سینیٹ پاکستان سعودی عرب تاریخی تعلقداری نا اہمیت ءِ تالان کرے۔ اوپارے کہ دا دورہ داہیت انا عکاسی ءِ کیک کہ ہڑتوم آ ملک آتا نیام اٹ تعلقداری، پت و شرف نا جوزہ غا تالان ءُ۔
