اسلام آباد۔ 25 جون (اے پی پی) بنجائی وزیر داخلہ محسن نقوی محرم الحرام اٹی جلوس و مجلس آتا داخلی و خارجی کسر تا سخت چیکنگ نا پارت کرسا پارے کہ جلوس و مجلس آتا چاروکی کن پوسکن آ ٹیکنالوجی ءِ کاریم اٹ اتنگک، اشتعال انگیز مواد آتا برخلاف زیروٹالرنس، سوشل میڈیا نا سخت مانیٹرنگ مریک، ملک دشمن زموار آتا ناپاک عزم ءِ بے سہب کننگ کن فول پروف سیکورٹی و ایلو بست وبند آتے ہرحال اٹ پک کننگے، امن و ایمنی ءِ برقرار تخنگ کن غٹ مکتہ فکر انا عالم دین آتون خڑکی رابطہ تخنگے۔ داخیال آتا درشانی ءِ او محرم الحرام اٹی سیکورٹی و ایلو بست وبند آتا بابت اہم دیوان ناکماشی ءِ کرساکرے۔ دیوان اٹی محرم الحرام اٹی اسلام آباد اٹی سیکورٹی و ایلو بست وبند آتا سرجمی اٹ جاچ ءِ ہلنگا، سیف سٹی ٹی مرکزی کنٹرول روم اس جوڑ، مجلس و جلوس آتا رکھ اکن درجاتی حصا رمریک، جوان ٹریفک پلان ، غٹ امام بارگاہ، مجلس و جلوس آتا ہند آتا جیو ٹیگنگ کننگے۔ داوخت آ گپ وتران کرسا بنجائی وزیر داخلہ جلو س ومجلس آتا داخلی وخارجی کسر تا سخت چیکنگ نا پرمان کرے وپارے کہ اشتعال انگیز مواد آتا برخلاف زیروٹالرنس ، سوشل میڈیا نا سخت مانیٹرنگ مریک۔ محسن نقوی پارے کہ جلوس و مجلس آتا چاروکی کن پوسکن آ ٹیکنالوجی ءِ کاریم اٹ اتنگک۔ اوپارے کہ ڈیوٹی آ تعینات کارندہ غاتا کن وخور ناب ست وبند انا خاص خیال ءِ تخنگے، کارندہ غاتا شفٹ اٹی تعیناتی ءِ کننگے تانکہ اوفتے آرام نا وخت دُوبرےو اومستعدی اٹ تینا فرض ءِ سرتننگ کیر۔ وزیرداخلہ محسن نقوی پارے کہ ملک دشمن زموار آتا ناپاک عزم ءِ بے سہب کننگ کن فول پروف سیکورٹی وایلو بست وبند آتے ہرحال اٹ پک کننگے، امن وایمنی ءِ برقرارتخنگ کن غٹ مکتبہ فکر انا عالم دین آتون خڑکی رابطہ تخنگے، ضابطہ اخلاق نا پابندی ءِ پک کننگے۔ وزیرداخلہ راج انا غٹ تپہ غاتے محرم الحرام اٹی فرقہ وارانہ ہم گرنچی ءِ پک کننگ نا خواست کرینے۔ دیوان اٹی ڈپٹی کمشنر اسلام آباد و ڈی آئی جی اسلام آباد محرم الحرام نا بابت بست وبند آتیا حوال تس۔ حوال اٹی پاننگاکہ محرم الحرام اٹی اسلام آباد اٹی 181 جلوس و 965 مجلس اڈتننگک، غٹ مجلس و جلوس آتا سیکورٹی آڈٹ ءِ پورو کننگانے۔ دیوان اٹی وزیر مملکت داخلہ طلال چوہدری، ایڈیشنل سیکرٹری داخلہ، ڈپٹی کمشنر اسلام آباد، اے ڈی سی جی، ڈی آئی جیز، غٹ ایس پیز و اسسٹنٹ کمشنرآک ہم بشخ ہلکر۔
