راولپنڈی۔24جون (اے پی پی):جنوبی وزیرستان ءِ دمگ سروگھا ءَ سیکورٹی فورسز ءِ نیمگ ءَ چہ انٹیلی جنس ءِ بنیات ءَ آپریشن ءِ وھد ءَ ھندوستان ءِ کمک ءَ 11خوارج بیران ءُ 7 ٹپیگ بوتگ اَنت ءُ پاک فوج ءِ دو سپاھیگ شھید بوتگ اَنت۔ آئی ایس پی آر ءِ نیمگ ءَ چہ جاڑی بوتگیں بیان ءِ رد ءَ سیکورٹی فورسز ءَ جنوبی وزیرستان ءِ دمگ سروغہ ءَ ناشرکاریں گل فتنہ الخوارج ءِ ھلاپ ءَ انٹیلی جنس ءِ زانتکاری ءِ بنیاد ءَ موثر آپریشن کتگ۔ اے خوارج ھندوستان ءِ سرپرستی ءَ راج دژمنیں کارانی تہ ءَ ھوار بوتگ اَنت۔ آپریشن ءِ وھد ءَ سیکورٹی فورسز ءَ خوارج ءِ پناہ گاہ ءَ سوبمندیں رنگے ءَ نشانگ جوڑ کتگ کہ ایشی ءِ آسر ءَ 11 ھندی کمک ءِ خواریج بیران بوتگ ءُ 7 ٹپیگ بوتگ اَنت۔ زبردستیں تیرگواری ءِ وھد ءَ پاک اُرد ءِ دلیریں افسر ضلع چکوال ءِ نندوکیں 37 سالی میجر سید معز عباس شاہ ءُ ضلع بنو ءِ نندوکیں 27 سالی لانس نائیک جبران اللہ شھید بوتگ انت۔ میجر معیز عباس شہید ءِ ہمت ءُ رہشونی مدام گیر آرگ بیت۔ آئی ءَ بازیں آپریشن ءِ تہا خوارج ءِ ھلاپ ءَ دلیری ءِ کرد پیلو کتگ۔ دمگ ءَ گیشتر خوارج ءِ ھست بوھگ ءِ ھلاسی ءِ ھاترا کلیئرنس آپریشن برجاہ اِنت۔ پاکستان ءِ سیکورٹی فورسز بھارت ءِ کمک ءَ ناشرکاری ءِ ھلاسی ءِ واستہ جزم انت پرچا کہ مئے شہید آنی قربانی مئے جزم ءَ را گیش مھکم کنت۔
