اسلام آباد۔24جون (اے پی پی):دری کارانی سیکرٹری آمنہ بلوچ ءَ سرجمیں دگنیا ءِ زالبولیں سفارتکار آناں ھاسیں رنگ ءَ زالبولاں کہ پاکستان ءِ نمائندگی ءَ سرجمیں لگن ءُ جوانیں رنگ ءَ کنگ ءَ اَنت آناں دل ءِ جہلانکی ءَ چہ مبارکی دات۔ سئے شمبے ءِ روچ ءَ درئی کارانی کارگس ءِ رد ءَ درئی کارانی وزیر ءَ سفارتکاری ءِ تہ ءَ زالبول آنی میاں اوستمانی روچ ءِ موہ ءَ وتی پیغام ءِ تہ ءَ گوشت کہ اے روچ ءَ جھان ءِ کار آنی تہ ءَ زالبول آنی نوکیں کرد ءِ سر ءَ چمشانک دیگ بیت۔ آئی ءَ گوشت کہ توامیں براعظم آنی تہ ءَ زالبول مزن تک ءِ سفارتکاری ءِ گوما مھکم ءُ مفاہمت ءَ را دیم ءَ برگ ءَ انت ءُ امن، دیمروئی ءُ کمک ءَ را دیم ءَ برگ ءَ انت۔ آمنہ بلوچ ءَ گوشت کہ زالبولیں سفارتکار دری پالیسی ءِ جوڑ کنگ ءَ اَنت، گپ ءُ تران آنی سروکی ءَ کنگ ءَ اَنت ءُ جھان ءِ گپ ءُ تران ءَ را مھکم کنگ ءَ اَنت۔ آئی ءَ گوشت کہ پاکستان ءَ زالبولیں سفارتکار آنی گیش بوھوکیں کیڈر ءِ سر ءَ فخر اِنت، آھانی ھست بوھگ مئے دری کارانی سروس ءَ ھوار کنگ ءُ صنفی توازن ءِ نیمگ ءَ پیشرفت ءِ نشانی اِنت۔ آئی ءَ گوشت کہ دری کارانی سیکرٹری ءِ بستار ءَ من زالبول آناں سفارتکاری ءِ تہ ءَ بھرتی ءُ دیمروئی ءِ واستہ فریم ورک ءَ را مھکم کنگ ءَ زالبول آناں دیمروئی دیگ ءُ آیوکیں نسل آنی واستہ موہ پیداک کنگ ءِ واستہ جزم آں ۔ دری کارانی سیکرٹری آمنہ بلوچ ءَ گوشت کہ پیچیدہ چیلنج آنی دیمپانیں دگنیا ءَ سفارتکاری ءِ تہ ءَ زالبول آنی کرد ناگزیر اِنت۔ آئی ءَ زور پر دات کہ ما میاں اوستمانی سیادی آنی تہ ءَ صنفی برابری ءِ واستہ وتی عزم ءِ دوبر پدر کنگ ءُ یک امن ءُ ایمنی ءِ ، انصاف ءِ جھان ءِ رھبند ءِ جوڑ کنگ ءِ تہ ءَ زالبول آنی المی کرد ءِ منگ ءَ ایں ۔
