اسلام آباد۔24جون (اے پی پی):ریلوے ءِ وفاقی وزیر محمد حنیف عباسی ءَ گوشت کہ ملک ءِ دیمروئی ریلوے ءِ دیمروئی ءَ گوں بندوک اِنت، پاکستان ءَ را زوت ریلوے ءِ ھوالگ ءَ وشیں ھال رس ایت، ارباں کلدار ءِ ریلوے ءِ زمین برآمد کنگ بوتگ اَنت، ریلوے اسٹیشن آنی تہ ءَ اپ گریڈ کنگ بوھگ ءَ اِنت، ریلوے ٹریک ءِ گہتری ءِ واستہ زورگ بوھگ ءَ انت، ٹرین ءِ ٹائمنگ ءِ ھوالگ ءَ ھچ وڑیں مراعات دیگ نہ بیت، مزن وزیر شہباز شریف ریلوے ءِ سر ءَ ھاسیں دلگوشی دیگ ءَ انت، ریلوے اسٹیشن آنی سر ءَ انفارمیشن ڈیسک جوڑ کنگ بوتگ انت، ما ٹرین ءِ میزبان آنی آسراتی ءِ بندات کتگ، پاکستان ءِ وردن ءُ وراک ءِ کوالٹی تھکو ریلوے ءِ سر ءَ جوڑ کنگ بوتگ۔ دق ءُ دمگی رابطہ، ریلوے ہوسٹس گرین لائن ءِ پائلٹ پروجیکٹ ءِ رد ءَ مریم نواز ریلوے ءِ سر ءَ کار کنگ ءَ اِنت، مریم نواز پنجاب ءَ باز کار کنگ ءَ اِنت۔ سئے شمبے ءِ روچ ءَ نیشنل پریس کلب اسلام آباد ءِ میٹ دی پریس پروگرام ءَ تران کنان ءَ ریلوے ءِ وفاقی وزیر محمد حنیف عباسی ءَ گوشت کہ مزن وزیر محمد شہباز شریف ریلوے ءِ سر ءَ ھاسیں دلگوشی دیگ ءَ اِنت۔ گوستگیں ہفتگ ءَ وہدے من مزن وزیر ءَ را ریلوے ءِ بابت ءَ 45منٹ ءِ بریفنگ دات گڑا آئی ءَ گوشت کہ تو اولی وزیر ئے کہ تو پریزنٹیشن دئے ئے۔ مزن وزیر ءَ منی کارکردگی ساڑات۔ وفاقی وزیر ءَ گوشت کہ ریلوے ءِ جوڑیشت ءُ دیمروئی ءِ گوما واش روم آنی ساپ ءُ سلہ ءِ سر ءَ ھم زور پر دات۔ مرچی ھم اگاں کسے من ءَ ریلوے ءِ بابت ءَ ویڈیو دیم دنت من ھما دمان ءَ ایشانی سر ءَ عمل کن آں ۔ آئی ءَ گوشت کہ پاکستان ءِ دیمروئی گوں پاکستان ریلوے ءَ بندوک انت۔ پاکستان ءَ تھر کول، ریکو دق ءُ دمگی رابطہ ءِ لوٹ اِنت۔ بھارت ءَ اے سال ءَ وتی ریلوے ءَ را 7 کھرب کلدار داتگ۔ حنیف عباسی ءَ گوشت کہ پاکستان ءَ را ریلوے ءِ ھوالگ ءَ زوت وشیں ھال رس ایت۔ روس ءِ نیمگ ءَ ٹرین ءِ روگ ءِ مئے تیاری سرجم بوتگ اَنت بلے ایران ءُ اسرائیل ءِ جنگ ءِ سوب ءَ دیر بوتگ۔ آئی ءَ گوشت کہ مریم نواز پنجاب ءَ سک باز کار کنگ ءَ انت، ریلوے ءِ گہتری ءُ دیمروئی ءِ واستہ پنجاب حکومت گیشتریں ھرچ ءُ درچ کنگ ءَ انت، پنجاب سرکار ءِ سرمایہ کاری ءَ ریلوے چار ماہ جوڑ کتگ۔ وفاقی وزیر ءَ گوشت کہ آئی ءَ اے درگت ءَ بلوچستان ءِ سر وزیر ءَ گوں ھم گپ ءُ تران کتگ، آ ھم ایشی ءِ تہ ءَ سرمایہ کاری کنگ ءَ ساڑی اِنت، وھدیکہ من اے بابت ءَ گوں سندھ ءَ ھم گپ ءُ تران کناں۔ آئی ءَ گوشت کہ آ ٹرین آؤٹ سورس کنگ ءَ اَنت، بولان میل، خشال خان خٹک ایکسپریس ءُ دگہ بندیں ٹرین بحال کنگ بوتگ اَنت، ایشی ءَ چہ الس ءَ را آسراتی رستگ، مئے ھر اسکول ءُ کالج میاں اوستمانی تک ءَ رو اَنت، ما ٹرین ءِ میزبان آنی آسراتی ءِ دیم ءَ آؤرتگ، غیر ضروری شعبہ آفس بند کنگ بوتگ اَنت وھدے کہ کسانیں کارندہ آفس بند کنگ بوتگ اَنت۔ میلیوناں کلدار ءِ پگاراں چہ وش اتک کنگ بوتگ۔ وفاقی وزیر ءَ گوشت کہ اے سال ءَ پاکستان ءِ 77سال ءِ راجدپتر ءَ ریلوے ءَ چہ گیشاں چہ گیش آمدنی بوتگ۔ اگاں حکومت گیش کمک بہ کنت گڈا آیوکیں سال ءَ ریلوے ءَ را منافع بخش ادارگ جوڑ کنگ بیت۔ حنیف عباسی ءَ گوشت کہ نیشنل پریس کلب مئے دومی گس انت۔ نیشنل پریس کلب راولپنڈی کیمپ آفس ءَ پد این پی سی اسلام آباد ءِ جم ءِ واستہ 100ملین کلدار ءِ کمک ءِ کوشست کناں۔ ریلوے ءِ وفاقی وزیر ءَ گیش گوشت کہ پاکستان ءَ بھارتی زوراکی ءِ سر ءَ جوانیں پسو داتگ، بھارت ءِ ھلاپ ءَ راجدپتری سوبمندی ءِ سر ءَ راج ءَ را فخر اِنت، سرجمیں راج ءَ بھارتی زوراکی ءِ ھلاپ ءَ سرجمیں یکوئی ءِ درشان کتگ ءُ فوج ءِ کمک کتگ۔ ایشی ءَ چہ پیسر این پی سی ءِ صدر اظہر جتوئی ءُ سیکرٹری نیار علی ءَ پریس کلب ءِ تر ءُ تاب ءِ سرا وفاقی وزیر ءِ منت گپت۔
