وزیراعظم نا خصوصی کمکار ہارون اختر ناکماشی ٹی دیوان، آٹوپالیسی و ایلو امور تا بارواٹی سجفنگا

اسلام آباد ۔24جون (اے پی پی) وزیراعظم نا خصوصی کمکار صنعت وپیدوار ہارون اخترخان ناکماشی ٹی اسلام آباد اٹی کارڈیلرز امپورٹرز ایسوسی ایشن نااہم دیوان اس مس ہراٹی آٹوپالیسی 2026 ، درآمدو برآمد و ودکی کسٹم ڈیوٹی تتون اوار کیہی اہم امور تا بارواٹی سجفنگا۔ خصوصی کمکار کارڈیلرز امپورٹرز ایسوسی ایشن ءِ پالیسی سازی نا عمل اٹی اسہ اہم اسٹیک ہولڈر گوندا۔ اوپیدوار کرے کہ وزیراعظم ناوژن گاڈی تا درآمد کن اسہ آجو و مقابلہ غا تالان نظام ءِ مون آدننگ ءِ۔ اوناپاننگ ئس کہ گاڈی تا درآمد اٹی آجومقابلہ ہندی مینوفیکچررز آ زور شاغک کہ او تینا کارکڑد ءِ گچین کے و برآمد آتا کنڈآ چکارکے۔ اوپارے کہ کاریم اٹ اتنگوک آ گاڈی تا درآمد نا آب ءِ پک کننگ کن حکومت رجسٹریشن و سرٹیفکیشن ءِ المی جوڑ کیک۔ چاگڑد دوست ٹرانسپورٹ نا کنڈآ گدریفنگ ءِ تالان کرسا ہارون اخترخان پارے کہ پاکستان داسہ پیٹرول آ تالان گاڈی تیان اینک پوسکن چاگڑد دوست گیگ بدل نا کنڈآ ہِننگ ءِ، وزیراعظم نا پارت آتا رداٹ حکومت قومی الیکٹرک وہیکل (این ایو ی) پالیسی 2025-2030درستی راستی کرفینے دا پالیسی نار داٹ پاکستان نا ہدف ءِ کہ 2030ء اسکان 22 لکھ گاڈی الیکٹرک مریر۔ ہارون اخترخان پارے کہ الیکٹرک گاڈی تا مون آ دننگ سمو گ نا چٹفنگ و الس نا جان جوڑی کن بے کچ اہم ءِ، دا گاڈیک نئے بیرہ کم خڑچ ءُ بلکنا لس و چاگڑد ہڑتوم آتیکن فائدہ مند ءُ۔ کارڈیلرز امپورٹرز ایسوسی ایشن وزارت صنعت و پیدوار ءِ باوری کرفے کہ او پالیسی عمل اٹی کمک کن تینا سرجم سلاہ تے پیش کیک۔ ہارون اخترخان ایسوسی ایشن ءِ باوری کرفے کہ حکومت اوفتا سلاہ تا خوڑتی اٹ جاچ ءِ ہلسا پورو کمک فراون کیک ۔