اسلام آباد۔ 24 جون (اے پی پی) بنجائی حکومت خیبرپختونخوا نا ضم مروک ضلع غاتیکن 35.968ار ب روپئی نا خصوصی شونداری فنڈ جاری کرے ، وزارت ءِ ڈٹ بندی ، شونداری و خصوصی گام گیج وزیراعظم محمد شہباز شریف نا منظوری آن دا فنڈ آتے جاری کرینے ہرا مسکوہی فاٹا کن بنجائی حکومت نا دہ سال انا شونداری ڈٹ آتا بشخ ءُ۔ وزارت ڈٹ بندی نا ترجمان نار داٹ دا ڈٹ پبلک سیکٹر ڈویلپمنٹ پروگرام (پی ایس ڈی پی)2024-25نا ردات نافذ کننگ انگ ءِ۔ داشونداری پیکج نا رداٹ چندی اہم ڈٹ آتا بناءِ کننگ انگ ءِ ہرافتے ٹی نمان انگا ڈٹ 120،000اُراتے شمسی توانائی نا کمک اٹ بجلی نا فراوانی ءِ ہراڑکن 13.5 ارب روپئی جتا کننگانے۔ دا ڈٹ اٹی 50 میگاواٹ نا یوٹیلیٹی مائیکرو گریڈ نا جوڑ کننگ ہم اوار ءِ تانکہ ہندی آبادی ءِ آخبتی، اڑزان و چاگڑد دوست بجلی فراوان کننگ مرے۔ داکان بیدس، 7 ارب روپئی پولیس تھانہ و چوکی تا تفنگ کن تخنگانے وخت اس کہ لیویز فورس انا پوسکن آ وڑتیا تنظیم نو ہم ہندا فنڈ آن کننگک تانکہ امن وایمنی ناگچینی ءِ پک کننگ مرے۔ تعلیم نا بشخ اٹی شونداری کن فاٹایونیورسٹی نا تعلیمی و ادارہ جاتی لائخی ءِ سوگو کننگ کن 2.5 ارب روپئی جتا کننگانے، داگام انا مسخت ضم مروک ضلع غاتا ورناتے بڑزکو تعلیم نا آب اٹ وارخواہی فراوان کننگ ءِ۔ ہندا چرجوئی ٹی خیبرپختونخوا حکومت نا خواست آ 13.145ارب روپئی جاری کننگانے تانکہ برجاشونداری ڈٹ آتا بقایاجات ادا و اوفتا وخت آ پوروی ءِ ممکن کننگ مرے ۔ بنجائی حکومت نا دا گام پدسلوک علاقہ غاتے شونداری نا قومی دنگ اٹ اوار کننگ نا ویژن نا عملی درشانیءِ ، ہرانا مسخت پائیدار شونداری، زرگزرانی وتواجہی و راجی آسودہی ءِ مون آ دننگ ءِ۔ ترجمان نار داٹ داگام گیج وزیراعظم شہباز شریف نا دا ویژن نا عملی درشانی ءِ ہرانا رداٹ ضم مروک ضلع غاتے شونداری نا قومی دنگ اٹ اوار کننگ و ہموجاگہ نا الس ءِ گچین آسودہی فراوان کننگ بنداوی مسخت ءِ۔ ترجمان نا پاننگ ئس کہ دا پیکج نئے بیرہ ہندی زرگزران ءِ متحرک کیک بلکن راجی آسودہی، تعلیم، روزگار و امن و ایمنی کون آاہم بشخ آتیا ہم مثبت اثرمرتب کیک۔
