اسلام آباد۔ 23جون (اے پی پی) وزیراعظم نا خصوصی کمکار صنعت وپیدوار ، ہارون اختر خان تون ازبکستان نا سفیر علیشیر تختیواوڑدہی کرے۔ اوڑدہی ٹی پاکستان و ازبکستان نا نیام اٹ ہڑتوم آ کنڈآتا اقتصادی، واپاری و صنعتی کمکاری ءِ مون آ دننگ آ سرجمی اٹ گپ وتران کننگا۔ وزارت صنعت و پیدوار نا کنڈآن جاری بیان نا رداٹ ازبک سفیر پاکستانی سرکڑدہ غاتا پدریسہ مخ تفی آ منت واری ءِہرفسا کشت وکشار، فارماسیوٹیکل، بجلی، خور و ای کامرس تون اوار چندی بشخ آتیٹی ہڑتوم آ کنڈآتا کمکاری ءِ پین ودفنگ آ زور شاغا۔ اوپاکستانی ڈیجیٹل کمپنی تے ازبک مارکیٹ اٹ زرکاری نا سلہ خلک و تعمیراتی مواد و فیرس و نان فیرس دھات آتا اسیجائی پیدوار اٹی است خواہی نا درشانی ءِ ہم کرے۔ ہارون اخترخان وزیراعظم شہباز شریف نا وژن ءِ مون آتخسا پارے کہ حکومت پاکستان ملک اٹی زرکاری ءِ مون آ دننگ کن سنبرینگوک ءِ۔ اوداہیت آ زور شاغا کہ پاکستان و ازبکستان نا نیام اٹ واپار ءِ 2 ارب ڈالر نا کہول اسکان سرکننگ کن پبی کوشست برجاءِ۔ اوڑدہی ٹی پبلک پروکیورمنٹ اٹی شریداری، خصوصی اقتصادی زون تیٹی اسیجائی زرکاری و ’’میڈاِن پاکستان‘‘ نمائش نا ازبکستان اٹی اڈتننگ آہم گپ وتران کننگا۔ ہڑتوم آ فریق آک فوڈ و کشاری گڑاتا واپار اٹی فائٹو سینیٹری کمکاری ءِ مون آ دننگ آہم امناکریر۔ ہارون اخترخان تاشقند و اسلام آباد نا نیام اٹ 14جون آن براہ راست جہاز آتا بنانا خیرمقدم ءِ کرے و پاکستان انٹرنیشنل ایئرلائنز (پی آئی اے) نا کمک اٹ ہم براہ راست جہاز آتا بناءِ کننگ نا سلاہ غا گپ وتران کننگا۔ ہڑتوم آملک آتا کاروباری حلقہ غاتا نیام اٹ رابطہ غاتے ودفنگ کن 25 جون آ کراچی ٹی ازبک۔ پاکستان بزنس فورم ہم اڈتننگک۔
