اسلام آباد۔ 23جون (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ حکومت مشکل حالیت آتیٹی بریبر ءُ بجٹ اس پیش کرینے، غٹ شریدار آتا سلاہ و سلاہ و سوج آک بجٹ نا بشخ ءُ، 12 لکھ اسکان نا کٹیا غا خراج نا کچ اسہ درسد تخنگ نا فیصلہ کننگانے، خراج نا تعمیل و بنداو اٹی ودکی آ چکار کننگ انگ ءِ، سولر پینل آتیا خراج نا کچ 10 درسد مریک، پمبہ و دسک انا درآمد آ سیلز خراج و ڈیوٹی نا چھوٹ ءِ چٹفنگک، 75 سال آن زیات وئی والا پنشنرآک ہروڑنا خراج آن مستثنیٰ ءُ۔ دوشنبے نادے آ قومی اسمبلی ٹی بروک آمالی سال انا بنجائی بجٹ آ لس شرہ ءِ چٹفسا وزیرخزانہ پارے کہ او وزیراعظم، ڈپٹی وزیراعظم، قومی اسمبلی نا باسک، قومی اسمبلی و سینیٹ نا قائمہ کمیٹی تا چیئرمین و باسک، سیوتی جماعت آتا باسک، قومی اسمبلی نا باسک و غٹ شریدار آتا منت وار ءِ ہرافک بجٹ نا تیاری، شرہ و دا بابت سلاہ و سلاہ و سوج آتے گڈیکو دروشم اس تننگ ات کمک فراوان کریر، داراہشونی نا سوب آن حکومت ءِ بریبر ءُ بجٹ اس تننگ اٹ کمک رسینگا۔ وزیرخزانہ پارے کہ بروک آ مالی سال اٹی حکومتی خڑچ آتیٹی کمتی و خراج نا بنداو و تعمیل آ زور شاغنگانے، خراج نا بنداو اٹی ودکی و تعمیل کن ایف بی آر اٹی اصلاحات و ڈیجیٹلائزیشن نا عمل ءِ مون آ دننگ انگ ءِ، تنخواہ دار تپہ غا خراج آتا بھاریم ءِ کم کننگانے، تعمیراتی بشخ ءِ ریلیف تننگا۔ وزیرخزانہ پارے کہ ٹیرف ءِ معقول کننگ اہمیت تخک، درآمدی خام مال و ٹیرف لائن تیٹی آسراتی آن نئے بیرہ برآمد آتیٹی ودکی مریک بلکن صنعت آتے مون آ دننگ و اصلاحات نا عمل ءِ مون آ دننگ اٹی ہم کمک رسینگک ، صنعتی پالیسی تیار ءِ و اونا پڑو زوت مریک وخت اس کہ الیکٹرانک گاڈی تیکن پالیسی نا پڑو ءِ ہم زوت کننگک۔ وزیرخزانہ پارے کہ توانائی تون اوار اوار اہم بشخ آتیٹی اصلاحات نا عمل برجاسلک، راجی آسودہی نا بشخ اٹی بے نظیر انکم سپورٹ پروگرام نا بجٹ 592 ارب روپئی آن ودفسا 716 ارب روپئی کرینن۔ دا گام آن کم و ود اسہ کروڑ خاہوت آتے مالی امداد فراوان کننگک۔ داڑتون اوار اوار حکومت نا پبی کوشست مریک کہ دا خاہوت آتا بندغ آتے کسب کار کننگے و اوفتے تینا زند آتیٹی بدلی اتنگ، نیزگاری نا چکر ءِ پرغنگ و زرگزران اٹی تینا کڑد ءِ ادا کننگ نا قابل کننگے ۔ دابابت حکومت ، بینظیر کسبکار پروگرام ءِ درکار وسیلہ فراوان کیک۔ ہنداوڑ حکومت برٹش ایشین ٹرسٹ نا شریداری اٹ پاکستان نا اولیکو اسکلز ایمپیکٹ بانڈ درستی راستی کرفنگ والا ءِ ہرا نتیجہ غاتیا تالان مالی کمکاری نا پوسکن ءُ درور اس جوڑمریک و ورناتے مارکیٹ تون ہم گرنچ تربیت فراوان کیک۔ وزیرخزانہ پارے کہ حکومت کشاری بشخ انا مون آ دننگ و چنکا بزغرآتا کمکاری کن بیدس ضمانت و نغد بنداو تیا وام فراوان کننگ نا فلیگ شپ پروگرام اس جوڑ کرینے ہرانا رداٹ دُوانزدہ ءُ نیم ایکڑ اسکان نا چنکا بزغرآتے ڈیجیٹل ذریعہ اٹ 10 لکھ روپئی اسکان نا وام تننگک۔ داوام تیان منظور مروک بج، کھد، کشاری دوائی وڈیزل نا ادائیگی ءِ کننگ مریک و بزغر ءِ فصل و زند انا بیمہ آسراتی ہم فراوان کننگک۔ داکان بیدس حکومت بزغرآتیکن الیکٹرانک ویئرہاؤس رسید نا نظام اس جوڑ کننگ والا ءِ ہرانا رداٹ اناج ءِ سٹور کننگ اٹ کمک رسینگک ، بزغرآتے تینا فصل انا گچین نہاد اس ملک و جم فوڈ سیکورٹی ٹی سوگوی بریک۔ اوپارے کہ حکومت قابل استطاعت ہاؤسنگ فنانس نا مون آ دننگ و اولیکو وار اُرا ہلنگ یا تفنگ نا خواہندار کم کٹیا والا بندغ آتیکن 20 سال انا مد انا وام اسکیم اس درستی راستی کرفنگ والا ءِ، زالبول آتا مالی شمولیت کن زالبول آتیکن مخصوص مالیاتی پروگرام نا رداٹ اسہ لکھ نود ءُ سہ ہزار آن زیات زالبول آتے 14 ارب روپئی نا وام فراوان کننگانے۔
