ملتان۔ 21 جون (اے پی پی):چیئرمین سینیٹ سید یوسف رضا گیلانی ءَ گشتگ پاکستان دمگ ءَ ایمنی لوٹیت، جنگ ہچ جیڑہ ءِ گیواری نہ انت۔ مسان بے نظیر بھٹو شہید ءِ سالروچ ءِ درگت ءَ ملتان ءَ رسانکدر ءَ گوں تران کنان ءَ سید یوسف رضا گیلانی ءَ گوشت کہ راجی اسمبلی ءُ سینیٹ ءَ ایران ءِ سر ءَ اسرائیل ءِ اُرش ءِ مذمت ءِ قرارداد ھم دمگی ایمنی ءِ دیمروئی ءِ ھاترا انت۔ اے جنگ ءِ ھلاس کنگ ءِ ھاترا اقوام متحدہ، انسانی حقانی میان استمانی گل ءُ اسلامی ملکاں موثریں کردے پیلو کنگی اِنت۔ آئی ءَ گوشت کہ دگنیا ءَ مدام ایمنی ءِ ھوالگ ءَ مئے کوشست آناں ساڑاتگ۔ سید یوسف رضا گیلانی ءَ گوشت کہ پاکستان ایٹمی طاقت انت ءُ دمگی ایمنی ءِ واستہ جوانیں کرد پیلو کنگ ءَ انت۔ چیئرمین سینیٹ ءَ گوشت کہ پاک بھارت ءُ کش ءُ چیل ءِ وھد ءَ مئے اُرد ءَ اے گپ ثابت کت کہ آ دگنیا ءِ جوانیں اُرد انت ءُ دژمن ءِ کجام ھم زوراکی ءِ پسو دیگ ءِ لائک انت۔ یک جست ءِ پسو ءَ آئی ءَ گوشت کہ آئی ءَ وتی دور ءَ جنوبی پنجاب ءِ واستہ بازیں دیمروئی ءِ کار کتگ۔ دل ءِ مردم ءَ پہ جنوبی پنجاب ءِ صوبہ ءَ انچو کوشست دگہ کس ءَ نہ کتگ۔ سرائیکی ءُ واسیب ءِ جیڑہانی گیش ءُ گیوار ءِ ھاترا یک جتاھیں استانے المی اِنت کہ ایشی ءِ ھاترا ما منظمیں رنگے ءَ جنبشے بندات کنیں۔ دانکہ ادءَ گریبی و نابودی ھلاس کنگ بہ بیت۔ محترمہ بے نظیر بھٹو ءِ سالروچ ءِ درگت ءَ شگر ءُ منت وار کنان ءَ آئی ءَ گوشت کہ اگاں مرچی انچیں مزنیں شخصیت ساڑی بوتیں گڈا استیں بحران ہلاس بوتگ ات انت۔ سید یوسف رضا گیلانی ءَ گوشت کہ بی بی شھید ءُ ذوالفقار علی بھٹو الس ءِ سروک بوتگ انت ۔ پہ گریب، کشت ءُ کشاری، مزدور ءُ کارگراں جنگ کتگ۔ چیئرمین سینیٹ ءَ گیش گوشت کہ آئی ءَ 1987 ءَ چہ بی بی شھید ءِ گوما کار کتگ ءُ کیس آنی دیمپانی کتگ بلے بی بی ءِ گوما ھمراہ داری ءَ اوشتاتگ۔ ایشی ءَ پد سید یوسف رضا گیلانی ءَ پیپلز پارٹی ءِ راہشون خواجہ رزوان عالم ءُ راؤ ساجد علی ءِ ہمراہی ءَ محترمہ بے نظیر بھٹو ءِ سالروچ ءِ کیک ہم کٹ اتگ۔ سٹی صدر ملک نسیم لابر،عابدہ بخاری ،ساجد۔ بلوچ،ملک منظور ڈمرہ ءَ ھوار مزنیں کساسے ءَ کارکن ھم ساڑی اتنت۔
