اسلام آباد۔20جون (اے پی پی):مزن وزیر محمد شہباز شریف ءَ ایران ءُ اسرائیل ءِ نیام ءَ سنگینیں بحران ءِ پرامن گیواری ءِ واستہ گپ ءُ تران ءُ سفارتکاری ءِ ضلورت ءِ سر ءَ زور پر دات ءُ گوشت کہ پاکستان انوگیں جاور ھال آنی تہ ءَ امن ءِ واستہ جوڑیشت ءِ کرد پیلو کنگ ءَ تیار اِنت، میاں اوستمانی جاور ھال نہ ایوک ءَ پاکستان ءُ سرجمیں دگنیا ءِ واستہ پریشان کنوک اَنت، تجارت ءَ ھوار جتا جتائیں شوبگ آنی تہ ءَ کمک، اے موہ ءِ سر ءَ مزن وزیر ءُ امریکی وزیر ءِ درئی کار ءَ دوئیں ملک آنی نیام ءَ عملی گامگیج آنی سر ءَ ھم تپاک کت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ امریکی وزیر ءِ درئی کار مارکو روبیو ءَ جمعہ ءِ روچ ءَ شپ ءَ مزن وزیر محمد شہباز شریف ءَ گوں ٹیلی فون کتگ۔ گرم ءُ مہروانیں گپ ءُ تران ءِ ساھت ءَ مزن وزیر ءَ صدر ڈونلڈ ٹرمپ ءِ نیکیں واھگ آنی درشان کت۔ آئی ءَ صدر ٹرمپ ءِ جرات مندیں سروکی ءِ توسیپ کت ءُ سیکرٹری مارکو روبیو ءِ فعال سفارتکاری ءِ توسیپ کت کہ آئی ءَ پاکستان ءُ بھارت ءُ بھارت ءِ جنگ بندی ءِ معاہدے ءِ سر ءَ سر بوھگ ءُ دوئیں ایٹمی سلاہ بندیں ملک آنی نیام ءَ مزنیں آفت ءِ دیم ءَ دارگ ءِ تہ ءَ کلیدی کرد پیلو کتگ۔ مزن وزیر ءَ گوشت کہ پاکستان ءِ بابت ءَ صدر ٹرمپ ءِ جوانیں بیان جنوبی ایشیا ءَ دائمی امن ءِ واستہ گیش دلبڈی ءِ سبب انت کہ ایشی ءَ را ایوک ءَ پاکستان ءُ بھارت ءِ نیام ءَ بامردیں گپ ءُ تران ءِ بندات ءَ چہ ممکن بوت کنت۔ اے درگت ءَ آئی ءَ جموں کشمیر، سندھ ءِ آپانی معاہدہ، تجارت ءُ ناشرکاری ءِ ھلاپ ءَ ھواریں درستیں بقایا جیڈھ آنی سر ءَ بھارت ءِ گوما کار کنگ ءِ واستہ پاکستان ءِ تیاری ءِ یک رندے پدا گوشت۔ اے موہ ءِ سر ءَ میاں اوستمانی جاور ھال ھاسیں رنگ ءَ ایران ءُ اسرائیل ءِ جیڈھ ءِ سر ءَ ھم گپ ءُ تران کنگ بوت۔ مزن وزیر ءَ گپ ءُ تران ءُ سفارتکاری ءِ وسیلگ ءَ اے گرانیں بحران ءِ گیواری ءِ ضلورت ءِ سر ءَ زور پر دات۔ آئی ءَ گوشت کہ پاکستان استیں جاور ھال آنی تہ ءَ امن ءِ واستہ کجام ھم رنگیں کوشست ءِ تہ ءَ جوڑیشت ءِ کرد ءَ پیلو کنگ ءَ تیار اِنت کہ ایوک ءَ پڑ ءِ واستہ بلکینگ ءَ سرجمیں دگنیا ءِ واستہ پریشانی ءِ سبب اِنت۔ صدر ٹرمپ ءِ تجارت ءِ سر ءَ دلگوشی ءِ حوالہ ءَ مزن وزیر ءَ گوشت کہ پاکستان ءُ امریکہ ءَ را تجارت، سرمایہ کاری، توانائی، کان کنی، معدنیات ءُ آئی ٹی ءَ ھوار بازیں شوبگ آنی تہ ءَ وت مہ وتی کمک ءَ را دیم ءَ برگ ءِ واستہ یکجائی ءَ کار کنگ ءِ ضلورت اِنت۔ سیکورٹی ءُ انسداد ناشرکاری ءِ ھوالگ ءَ مزن وزیر ءَ سرجمیں ملک ءَ چہ ناشرکاری ءِ ھترہ ھاسیں رنگ ءَ بی ایل اے، ٹی ٹی پی ءُ ایندگر جنگول گل آنی نیمگ ءَ چہ پیداکیں ھترہ ءِ دیم ءَ دارگ ءِ پاکستان ءِ عزم ءِ یک رندے پدر کت۔ اے درگت ءَ سیکرٹری مارکو روبیو ءَ پاکستان ءِ ناشرکاری ءِ ھلاپ ءَ کوشست آناں ساڑات ءُ پاکستان ءَ را اے رنگیں درستیں ھوپ آنی گر ءُ دار ءِ واستہ امریکہ ءِ سرجمیں کمک ءِ دل یکیمی دات۔ مزن وزیر ءَ اے ہفتگ ءِ بندات ءَ واشنگٹن ءَ صدر ٹرمپ ءُ چیف آف آرمی اسٹاف فیلڈ مارشل سید عاصم منیر ءِ نیام ءَ سک باز دوستانہ ءُ پائدگ مندیں گپ ءُ تران ءِ سر ءَ دل یکیمی ءِ درشانی کت۔ مزن وزیر ءُ دری کارانی وزیر مارکو روبیو ءَ اے گپ ءِ سر ءَ تپاک کت کہ دوئیں ملک آنی نیام ءَ گپ ءُ تران ءَ را نوں درستیں پڑ آنی تہ ءَ ٹھوس گامگیج آنی تہ ءَ بدل کنگ بہ بیت۔ مزن وزیر ئَ پاکستان ءُ امریکا ئِ نیام ئَ اے جوانیں رپک ئِ دیم ئَ برگ ئِ واستہ مُدار مزن تک ئَ رابطہ آنی ضلورت ئِ سر ئَ ھم زور پر دات۔ دو نیمگی سیادی ءِ ھوالگ ءَ آئی ءَ صدر ٹرمپ ءَ را پاکستان ءِ سرکاری تر ءُ تاب ءِ واستہ دعوت ءِ یک رندے پدا گوشت کہ من ھم زوتاں چہ زوت صدر ٹرمپ ءَ گوں گند ءُ نند ءِ ودار ءَ آں ۔ مزن وزیر ءَ سیکرٹری مارکو روبیو ءِ سلام دات انت۔ آئی ءَ وتی زوتیں آسراتی ءِ وھد ءَ پاکستان ءِ تر ءُ تاب ءِ دعوت ءِ پدا زور دات۔ مزن وزیر ءِ ٹیلی فون کال ءِ رسگ ءِ سر ءَ شگر ءُ منت گپت ءُ سیکرٹری مارکو روبیو ءَ پاکستان ءُ امریکہ ءِ نیام ءَ وت مہ وتی دلچسپی ءِ توامیں شوبگ آنی تہ ءَ دو نیمگی کمک ءَ را گیش کنگ ءِ واھشت ءِ درشان کت۔ آئی ءَ پاکستان ءِ گوما بھارت ءِ گوما جنگ بندی ءِ مفاہمت ءِ برجائی ءِ ھوار خطہ ءَ امن ءِ واستہ برجاھیں کوشست آناں ساڑات۔ اے درگت ءَ آئی ءَ پاکستان ءَ را دلبڈی دات کہ آ ایران ءِ گوما جوانیں سیادی ءِ واھند اِنت آ ایران ءِ گوما برجاھیں امن کوشست آنی تہ ءَ وتی کرد ءَ را برجاہ بہ دار ایت۔ آئی ءَ گوشت کہ امریکا دمگی ءُ جھان ءِ امن ءُ ایمنی ءِ دیمروئی ءِ واستہ پاکستان ءِ گوما کار کنگ ءِ واستہ جزمیگ انت۔
