اسلام آباد۔ 20جون (اے پی پی) بنجائی وزیر ڈٹ بندی، شونداری و اصلاحات احسن اقبال اسلام آباد نا H-11سیکٹر نا زیر تعمیر نیشنل پولیس ہسپتال نا دورہ ءِ کرے ۔ داوخت آ وزیر مملکت داخلہ طلال چوہدری، آئی جی اسلام آباد و ڈپٹی کمشنر اسلام آباد ہم اوڑتون اوار ئسر۔ دورہ ٹی احسن اقبال ہسپتال نا تعمیراتی پیش رفت ءِ است بڈ گوندا و تعلقدار کمامدارآتے پارت کرے کہ ڈٹ انا پوروی ءِ جون 2026اسکان ہر حال اٹ ممکن کننگے۔ بنجائی وزیرپارے کہ دا ڈٹ ننا پولیس کارندہ غاتا راجی آسودہی و جان جوڑی نا آسراتی تا فراوانی کن اسہ اہم ءُ گام اسے، ہرا ریاست نا کنڈآن کانود نافذ کروک آ ادارہ غاتیکن سنجیدہ عزم انا غمازی ءِ کیک۔ اوپارے کہ پولیس فورس ننا داخلی سلامتی نا اولین دفاعی لائن ءِ و اونا جان جوڑی و رکھ ءِ پک کننگ ریاست نا زمواری ءِ۔ احسن اقبال ڈٹ انا سرجم آتے بیان کرسا پارے کہ 100 کٹ آتیا تالان دا پوسکن آ ہسپتال مریک، داٹی جنرل میڈیسن، سرجری، ایمرجنسی و ہلہلہ ئی طبی آسراتی فراوان کننگک، ہسپتال نا پوروی آن کم وود 12000 پولیس کارندہ غاتے براہ راست پوسکن طبی آسراتی دوئی مریک۔ بنجائی وزیر زور شاغا کہ نیشنل پولیس ہسپتال نا ڈٹ مئی 2023اٹی منظور کننگاسس۔ دانا وخت آ پوروی ننا قومی فرض ءِ۔ دا ڈٹ آک الس نا خراج آن تفنگرہ و داننکن اسہ قومی امانت نا حیثیت تخرہ ہرافتا رکھ و پوروی ٹی ڈیوالئی ءِ سگنگ مفک۔ داوخت آ ڈٹ انا انجینیئر، تعلقدار وزارت آتا آفیسر، آئی جی اسلام آباد و ایلو کمامدارآک حوال تسر و تعمیراتی عمل نا تازہ حالیت آتیان معلومدار کریر۔ احسن اقبال ڈٹ اٹی شفافیت ، آب و رفتار ءِ برقرارتخنگ نا پارت کرے و پیدوار کرے کہ شونداری ڈٹ آتا پائیدار بنداوتیا پوروی ہی راج انا نزور تپہ غاتا گچینی و ریاستی ادارہ غاتا سوگوی نا ضامن ءِ ۔
