راولپنڈی ۔20جون (اے پی پی) چیف آف آرمی اسٹاف فیلڈ مارشل سید عاصم منیر ڈیہہ اٹی امن وسوگوی کن پاکستان نا بدل مفروک وابستگی آ زور شاغانے و جہانی اصول آتیا تالان جہانی نظام نا مخ تفی نا درشانی ءِ کرینے۔ اوپاکستان و امریکہ نا نیام اٹ انسداد ہشت گردی ، علاقائی سلامتی و زرگزرانی شونداری کون آبشخ آتیٹی ہڑتوم آ کنڈآتا کمکاری نا اہمیت ءِ تالان کرے ۔ جمعہ نادے آ آئی ایس پی آر آن جاری بیان نا رداٹ امریکہ نا سرکاری دورہ ٹی چیف آف آرمی اسٹاف فیلڈ مارشل سید عاصم منیر واشنگٹن ڈی سی ٹی بڑزکو امریکی اسکالر، جاچکار، پالیسی چاہندار و جہانی میڈیا نا نمائندہ غاتون سرجمی اٹ گپ وتران کرے۔ دااوڑدہی نا مسخت پاکستان نا اصولی موقف ءِ تالان کننگ، ڈیہہ و دنیا نا اہم باندات آتیا پاکستان نا موقف ءِ گچین وڑاٹ پیش کننگ و تین پہ تینی افہام و تفہیم ءِ مون آ دننگ ئس۔ داوخت آ فیلڈ مارشل معرکہ حق و آپریشن بنیان مرصوص نا سرجم آتے بیان کرے۔ اودہشت گردی نا برخلاف پاکستان نا قربانی تے تالان کرے و دہشت گردی ءِ بطور ہائبرڈ وار فیئر کاریم اٹ اتوک آ علاقائی زموار آتا پیدواری ءِ کرے۔ اوڈیہہ اٹی امن و سوگوی کن پاکستان نا بدل مفروک وابستگی آ زور شاغا و جہانی اصول آتیا تالان جہانی نظام نا مخ تفی نا درشانی ءِ کرے۔ فیلڈ مارشل پاکستان نا قابل قدر ولے غیر استعمال شدہ لائخی تا ذکر ءِ کرسا آئی ٹی، کشت وکشار و معدنیات نا بشخ آتیٹی جہانی زرکاری نا سلہ ءِخلک۔ فیلڈ مارشل جہانی و علاقائی جھیڑہ غاتیا پاکستان نا متوازن نقطہ نظر ءِ ہم تالان کرے و مکالمہ ، سفارت کاری و جہانی کانود نا پاسداری آ زور شاغا۔ پاک۔ امریکہ متکن آ تعلقداری تا جاچ ءِ ہلسا چیف آف آرمی اسٹاف انسداد دہشت گردی، علاقائی سلامتی و زرگزرانی شونداری کون آ بشخ آتیٹی ہڑتوم آ کنڈآتا کمکاری نا اہمیت ءِ تالان کرے۔ بشخ ہلوک آک فیلڈ مارشل نا پیدوار ، اصولی و باپت موقف ناستاءِ کریر و دااوڑدہی ءِ پاکستان و امریکہ نا نیام اٹ تزویراتی مکالمہ ٹی اسہ مثبت ءُ پیش رفت اس گوندار۔ دااوڑدہی پاکستان نا شفاف سفارت کاری ، جہانی تعلقداری ٹی فعال بشخ ہلنگ و پرامن بقائے تین پہ تینی کن اونا عزم انا ڈیک ءِ۔
